BILBO, 16 (EUROPA PRESS)
Pete Seeger New Yorkeko folk kantariaren omenezko kontzertu berezia egingo da martxoaren 26an, Loraldia Festibalaren baitan, Bilboko Arriaga antzokian. Emanaldi bakarra izango da, Loraldia jaialdiaren ekoizpen propioa, eta, Lou Topet bandak eta Harkaitz Canok gidatuta, Seegerren kantutegi oparoari berrikusiko du. Aiora Renteria, Anje Duhalde, Eñaut Elorrieta, King Konsul, Joseba Irazoki eta Izaro musikari gonbidatuek parte hartuko dute, Harkaitz Canok euskaratutako Seegerren kanten bertsioak jotzen.
"Musikari bikaina izateaz gainera, estatubatuar ezkerraren izen nabarmenetakoa ere izan zen Seeger, eta Euskal Herriko zein nazioarteko egile abeslariengan eragin handia izan zuen", azaldu dute antolatzaileek kontzertuaren aurkezpen prentsaurrekoan.
Loraldia Festibalak Harkaitz Canori eta Lou Topet bandari egindako enkargu baten emaitza da Arriagako kontzertua. Lou Topetek -Oier Aranzabal (ahotsa, gitarra, armonika), Rafa Rueda (gitarra, ahotsa), Oihan Larrañaga (baxua), Ander Zulaika (bateria) eta Joserra Senperena (pianoa)- "Abesti bat gutxiago" bertsioen diskoa atera zuen 2015ean eta Seegerren abesti bat bildu zuen: "Loreak non dira" (Where have all the flowers gone).
Loraldiaren proposamena jaso eta gero, musikariek eta Harkaitz Canok elkarlanari eutsi zioten. "Bertsioak egiterakoan, ahalik eta geureen egiten saiatu gara. Loraldiaren mandatua aukera bat eta gure aurreko diskoaren apendize bat bezala hartu genuen, oso gustura hartu ere. Pete Seegeren zale amorratuak gara", azaldu du Oier Aranzabal Lou Topet bandaren sortzaileak.
Arriagakoa "kontzertu oso berezia" izango dela ziurtatu du. "Seegerren kantutegiari errepaso bat emango diogu, baina gure eremura ekarrita. Dibertigarria izango da, ze publikoak batzuetan asmatu egin beharko du zein abesti jotzen ari garen. Guretzat handia da Pete Seegerren abesti sorta gure kantutegira ekartzea, hemendik aurrera abestu ahal izango dena", gaineratu du.
"PETE SEEGER GOGOAN"
Lou Topet taldeak "Pete Seeger gogoan" EP laburra grabatu du eta disko horren edizio mugatu bat argitaratu da Loraldia Festibalarekin elkarlanean, kontzertuaren amaieran eskuratu ahal izango dena. Arriagako emanaldirako prestatutako errepertorioaren testigantza uzteko asmoz grabatu da EPa. 300 ale argitaratu dira, eskuz egindako tirada zenbakidunean. Euskarri digitalean ere eskuratu ahal izango da, doan, seeger.loutopet.com webgunearen bidez.
Ekimen honekin, Loraldia Festibalaren asmoa Seeger omentzea izan da. Belaunaldi jakin batentzat mitikoa izan zen kantari iparamerikarra. Bruce Springsteen bezalako nazioarteko puntako musikari askok euren kanten bertsioak argitaratu dituzte. Euskal egileen artean, Benito Lertxundik, Fermin Muguruzak edo Garik egin dituzte Seegerren bertsioak.
Euskal Herrian behin egon zen Seeger, 1971an, Donostiako Victoria Eugenian, Ez Dok Amairu mugimenduak gonbidatua, eta kantaldi historiko eta emozioz beteta eskaini zuen, poliziak antzokia inguratzen zuen bitartean.
1940ko hamarkadan AEBetako Alderdi Komunistako kidea izan zen Seeger eta, ondorioz, zigorra eta Gobernuaren boikota sufritu zituen. 2009an, berriz, Obamaren presidentziaren inaugurazio festan parte hartu zuen. Bere lan ezagunen artean "Historias del Batallón Lincoln" diskoa, "Guantanamera" ospetsuaren bertsio ospetsua edota "Little boxes" abesti ironikoa daude.
