BILBO, 4 (EUROPA PRESS)
Muskizko (Bizkai) Udaltzaingoak gidari bat atxilotu zuen joan den asteartean, irailaren 1ean, alkoholaren eraginpean gidatzeagatik. Ertzaintzaren instalazioetan bere ibilgailua miatzean, 450 gramo heroina (pakete baten barruan) eta 125 gramo marihuana (poltsa baten barruan) aurkitu zituzten. Horrez gain, bere arropen artean pistola bat zeraman ezkutuan, legez kanpo lortutakoa. Atxilotutako gizona ostegunean sartu zuten Basauriko kartzelan, agintari judizialek hala aginduta.
Eusko Jaurlaritzako Segurtasun Sailak jakinarazi duenez, joan den asteartean, 10:30 aldera, Muskizko Udaltzaingoa La Arena hondartzako aparkalekura joan zen, ibilgailu bat zamalanetarako lekuan aparkatuta zegoelako eta barrruan pertsona bat lotan zegoelako. Agenteek gidaria lotan aurkitu zuten, eta adierazi zioten kotxea ezin zuela leku horretan aparkatu.
Ford Fiesta markako ibilgailua martxan jarri, eta ikusi zuten gidariak ez zuela behar bezala gidatzen, behin eta berriz joaten baitzen kontrako bidera. Beraz, ibilgailua geldiarazi zuten. Gidaria alkoholaren eraginpean zegoela egiaztatu ondoren, atxilotu egin zuten.
Atxilotua eta bere kotxea Ertzaintzaren Muskizko instalazioetara eraman zituzten, eta bertan frogatu zuten gidabaimena erretiratuta zeukala. Gorputzaren miaketa egitean, honako hauek aurkitu zizkioten: Astra markako pistola bat (serieko zenbakia ezabatuta zuen), lau telefono mugikor eta drogaz beteriko hainbat poltsatxo (kopuru txikiak).
Ondoren, bere ibilgailua miatu zuten drogarik zegoen detektatzeko, Ertzaintzako txakurren unitateak lagunduta, eta poltsa bat aurkitu zuten: barruan 450 gramo heroina (pakete batean) eta 125 gramo marihuana (poltsa batean) zituen. Froga horiek izanik, armak legez kanpo izatearen delitua eta drogak trafikatzearen delitua leporatu zitzaizkion.
Atxilotutako gizonak 52 urte ditu, eta delitu zerrenda luzea du drogak trafikatu eta indarkeriaz lapurtzeagatik. Ostegun arratsaldean epaitegira eraman zuten eta epaileak Basauriko kartzelan sartzeko agindu zuten.
