Plazebo-efektua aztertu dute iraileko "Elhuyar" aldizkarian

BILBO 1 Sep. (EUROPA PRESS) -

"Elhuyar Zientzia eta Teknologia" aldizkariak ustezko botiken plazebo-efektua aztertu du, luze eta zabal, iraileko zenbakian. Plazebo-efektuari buruzko zenbait xehetasun azaltzen dira, alde batetik, zenbaki honetan. Bestetik, efektu horri buruzko zenbait azalpen, eta, azkenik, plazeboekin lotutako alderdi etikoak ere lantzen dira.

Elhuyar Fundaziotik azaldu dutenez, ustezko botika bat hartu eta sendatzen duela pentsatzeak egiazko botika baten efektua izan dezake zenbaitetan. "Itxaropen-pilulak" deitzen zaie plazebo horiei, eta, zenbaiten ustez, eragin terapeutikoa izatera irits daitezke.

Bigarren Mundu Gerran izan zuen plazebo-efektuaren berri medikuntza modernoak: ebakuntza batean, morfinarik ez zutenez, gatza eman zioten medikuek soldaduari. Soldaduak ez zuen minik sentitu, eta morfina hartu izan balu bezala erreakzionatu zuen. Harrezkero, plazebo-efektua eragiten duten mekanismo fisiologiko, biokimiko eta immunologikoak argitzen hasiak dira ikertzaileak, eta gauza bat behintzat garbi ikusten dute: buruan dago sendabidea.

Bestalde, plazeboaren erabilerak zalantza etiko handiak sortzen ditu mediku-kontsultetan zein ikerketa klinikoan. Horri buruzko iritziak ere plazaratu ditu iraileko "Elhuyar" aldizkariak.

Horrez gain, beste erreportaje hauek ere aurkituko dira zenbaki honetan: elkarrizketa Joe Silk Oxfordeko Unibertsitateko kosmologoari; Espazioko menua, espazioko gastronomiaren berri.

Atal finkoetan, berriz, gai hauek landu dira: Mundu digitala, Web mugikorretik nabigatzeko modu berriak (II): atzipen multimodala; Mundu ikusgarria, Sardinia, mendia itsasoan; Gai librean, sauna, nerbio-anorexiaren irtenbide ote?; Analisia, darwinkeria, Kepa Altonaga EHUko biologia irakaslearen eskutik; Gogoetan, UTM, geografia modernoaren errege; Istorioak, Weigl doktorearen zorriak; Liburutegia, Microcosmos / Lynn Margulis eta Dorion Sagan.

"Elhuyar Zientzia eta Teknologia" aldizkariaren iraileko zenbakia dagoeneko salgai dago liburu-denda nagusietan eta www.elhuyar.org/edizioak webgunean.