BILBO, 27 Ene. (EUROPA PRESS) -
AlhondigaBilbao kultur eta aisialdiko zentroak euskal sortzaile berrien aldeko apustua egin du "Atrio Projects" izeneko programarekin. Egitasmo berriaren bidez, urte osoan, zentroko Kulturen Atarian tokiko 11 artistaren eta Estatuko bi artistaren proposamenak ikusi ahal izango dira. Lehenengo saioa larunbat honetan, urtarrilaren 28an, izango da, Primordiales euskal taldeak "Primordiales. Imaginario audiovisual electrochamánico" ikuskizuna aurkeztuko baitu.
Philippe Starckek AlhondigaBilbaoko ataria XXI. mendeko plaza publiko handia izateko diseinatu zuen, herritar guztiei, kulturako eta gizarteko mugimendu garaikide guztiei, forma artistiko berriak aurkitzeari irekita, zentro bilbotarreko arduradunek adierazi dutenez.
Horrexegatik, orain, Kulturen Ataria "Atrio Projects" programaren erdigunea izango da da. Programa AlhondigaBilbaok sortzaile berrien alde egindako apustua da, eta horretan herritarrak doan hurbil daitezke hasten ari diren artisten eta taldeen lanetara. Horientzat guztientzat, kasu askotan, muntaiak estreinatzeko aukera bikaina izango da.
Atrio Projects 2012an abiatuko da tokiko 11 talderen, Madrilgo talde baten eta Bartzelonako beste talde baten esku-hartze artistikoekin. Performancea, kontzertuak, dantza garaikidea, bideo instalazioak edo joko multisentsorialak izango dira abangoardiako eszenografia honetan, ikuslea eta teknologia berriak izanik protagonistak.
Modu honetan, larunbat honetan, urtarrilaren 28an, Primordiales euskal taldeak inauguratuko du programa berri hau, "Primordiales. Imaginario audiovisual electrochamánico" ikuskizunarekin. Horretan,
irudia eta sonua kontzientzia kolektiboan dauden uneen eszenografia iradokigarriarekin uztartzen dira. Bertaratzen direnek 19:00etan eta 21:00etan ikusi ahal izango dute proposamena Kulturen Atarian. Sarrera doakoa da.
Aurten ikusgai izango diren 13 proposamenak 2011ko irailaren 8tik urriaren 20ra bitartean aurkeztutako 43 proiektuen artean hautatu ziren. Data horiek ezarri zituen AlhondigaBilbaok deialdi irekirako. Hasieran gehienez hamar proiektu onartuko zituztela ezarri zen, baina kalitatea handia zenez, azkenean 13 proiektu hautatu zituzten.
"Atrio Projects" proiektuaren lehenengo edizioko epaimahaian euskal kulturaren arloko pertsona esanguratsuak egon dira: Juan Zapater BilbaoArteko zuzendaria, Andres Granados BilbaoMusikako zuzendaria eta Iban Gaztanbide Up Art!-eko kidea.
