BILBO, 27 (EUROPA PRESS)
Zinebi Bilboko Dokumentalen eta Film Laburren Nazioarteko Jaialdiak urte osoan zehar bere programazioari jarraipena emateko antolatu duen Hileko Dokumentala estreinaldien zikloak Sara Ishad Yemengo zinemagileak zuzendutako "The Mulberry House" (2013) filma eskainiko du ostegunean, urriaren 29an. Emanaldia Multicine aretoan izango da, 20:00etan, eta sarrerak 3,70 euroko prezioa izango du, antolakuntzak jakinarazi duenez.
"Mundu arabiarrean gertaturiko eta biztanleek euren ordezkari politikoen aurrean duten haserrea erakusten duten gizarte altxamenduen eszenatoki" izan da Yemen, eta egoerak "gerra zibil beldurgarria eragin du". Sara Ishaq zuzendaria Yemenen jaio zen, eta han bizi izan zen 17 urterekin amarekin Eskoziara bizitzera joan arte. Hamar urte geroago, 2011ean, Sara Yemenera itzuli zen, beste pertsona bat bilakatuta, kamera bat eskuan eta bere sustraiak berriro aurkitzeko asmoz.
Familiako istorio intimo horren erdian, azken urteetako fenomeno soziopolitiko garrantzitsuenetako bat hasi zen: udaberri arabiarrak. Sararen familiak parte hartze aktiboa izan zuen Saleh presidentea kargutik kentzea eta emakumeentzat eskubidea eta askatasun gehiago eskatzen zuten lehenengo manifestazioetan.
Horrela, klase ertaineko familia baten "erretratu intimo eta sentikor" gisa hasten den dokumentala, 2011ean Yemenen izandako altxamendu demokratikoei buruzko testigantza bilakatu da, eta, aldi berean, Ali Abdullah Saleh-en erregimen autoritarioaren errepresioaren erakusgai ere.
Sara Ishaq Yemenen jaio zen, 1984an, eta Edinburgh College of Art izenekoan ikasi zuen zinea. BBC telebistak Ekialde Ertainean egindako zenbait ekoizpen lanetan hartu du parte. Bere lehenengo film labur dokumentala, "Karama Has No Walls" (2012), BAFTA New Talent Award sarietarako izendatuta egon zen, eta hainbat sari irabazi zituen nazioarte mailan. "The Mulberry House" bere lehenengo film luzea da.
