BILBO, 3 (EUROPA PRESS)
SPRIko zuzendari nagusi Alexander Arriolak enpresa bisita bat hasi du Argentinan, euskal enpresentzako dauden negozio aukera handiak bultzatzeko asmoz, Argentinako Gobernuak konpromisoa hartu baitu ia 6.600 milioiko inbertsioak egiteko Munduko Bankuak eta Amerika arteko Garapenerako Bankuak finantzaturiko garapen proiektuetan. Eusko Jaurlaritzako Ekonomiaren Garapen eta Lehiakortasun Sailaren menpeko agentziako zuzendari nagusia harremanetan jarriko da Argentinan kokatuta dauden 37 euskal enpresen ordezkariekin.
Antzeko helburuekin hiru egunez Kolonbian egon ondoren, Arriola Buenos Airesera joan da erakunde eta enpresa mailako bilerak egiteko bertako eragile nagusiekin, "Argentinak une erabakigarria bizi baitu duela hiru hilabete gertatutako gobernu aldaketa historikoaren ondoren", SPRIko iturriek azaldu dutenez.
SPRI izan da Inbertsioak eta Nazioarteko Merkataritza Sustatzeko Agentzia Nazional sortu berriko zuzendari Juan Procaccinirekin bildu den lehen garapen agentzietako bat, "funtsezko kontaktua" baita inbertsio argentinarrak sustatzeko Euskadin. Era berean, Arriolak bilerak egin ditu Buenos Aires probintziako Gobernazioko idazkari nagusiarekin eta Buenos Aires Hiri Autonomoko Gobernuko Inbertsioen Kudeaketako zuzendariarekin, herrialdeko gune ekonomiko eta produktiboetan egin daitezkeen etorkizuneko inbertsioak ezagutzeko.
Bestalde, Argentinako Errepublikako Industria Metalurgikoen Elkartea bisitatuko du, hango zuzendaria SPRIren egoitzan izan baitzen 2015eko irailean eta harreman bikaina baitute ordutik. Ondoren, SPRIko zuzendari nagusiak Munduko Bankuaren eta Amerika arteko Garapenerako Bankuaren Argentinako egoitzak bisitatuko ditu, bi erakunde horiek datozen urteetan egingo dituzten lizitazio publiko interesgarrien berri jakiteko.
Azkenik, lan gosari bat antolatu da Argentinan kokatutako euskal enpresa guztiekin, eta gosari horretan zerga arloko aditu batek gonbidatu gisa parte hartuko du hitzaldi bat emateko bertaratzen diren euskal enpresei.
