GASTEIZ, 24 (EUROPA PRESS)
Ramiro Gonzalez Arabako diputatu nagusiak eta Cesar Rico Burgoseko Diputazioko presidenteak bi erakundeen arteko esparru hitzarmen bat izenpetu dute astelehen honetan. Akordioak ezartzen du Arabako Aldundia eta Burgoseko Diputazioa elkarlanean ariko direla 13 gaitan, eta horren bidez, Trebiñuko Konderriak "bizi kalitate hobea" izango duela jakinarazi dute.
Gonzalezek azpimarratu duenez, "urrats garrantzitsua da trebiñutarrek ere arabarrek dituzten zerbitzu publikoak izan ditzaten. "Gertuago gaude orain Trebiñu zortzigarren kuadrilla bihur dadin", nabarmendu du Arabako diputatu nagusiak.
Hitzarmenak bi urteko iraupena izango du, eta beste bi urtez luzatu ahal izango da. Aurreikuspena da akordioa amaituko dela "behin betiko konponbide bat aurkitu ondoren, antolamendu juridikoaren arabera, enklabearen egoerari konponbide iraunkorra emango diona".
Bi erakundeen arteko hitzarmenak 13 gaitan gauzatuko den elkarlana jasotzen du, besteak beste, suhiltzaile, euskara, azpiegitura, neguko bide sare eta garraio arloetan. Gainera, gai horiek mugakide diren guneetan bizi diren herritarrentzat ere zabaldu ahal izango dira.
"Gure buruari ezarri genion helburutzat trebiñuarren zerbitzu publikoak hobetzea, eta, hori, hain zuzen, segurtasun juridikoarekin egitea, argi zedarrituz erantzukizunak, eta lortu dugu", adierazi du Arabako diputatu nagusiak.
Hitzarmena sinatu ondoren, bi erakundeen sailek berariazko arauak prestatuko dituzte gai bakoitzerako, zehaztasunez adieraziz zer zerbitzu emango diren eta zerbitzu bakoitzaren jardun eremua. Gaiok lantzeko zazpi batzorde eratuko dira.
