DONOSTIA, 15 (EUROPA PRESS)
Zerga bilketa metatua %4 igo da Gipuzkoan apirila arte, aurreko urteko aldi berdinarekin alderatuta, eta horrela, 1.403 milioi euro bilduta, 2016an baino 38 milioi gehiago batu dira aurten. Sarreren atalean, PFEZ eta BEZaren Estatuarekiko doikuntzen hobekuntzak eta bi zerga hauetan eta Sozietateetan itzulketa murriztu izanak azaltzen dute igoera. Eragin negatiboa izan duten kontzeptuen artean, aipagarriena BEZaren lurralde arteko doikuntzen jaitsiera da.
Jabier Larrañaga Gipuzkoako Aldundiko Ogasun eta Finantza diputatuak datuen irakurketa positiboa egin du, gogoratuz aurreko hilabeteetako hazkundea leundu bada ere, "hori pasa den urtean izan genuen ezohiko apirilak" azaltzen duela.
"Aldagai nagusiak, foru Ogasunaren esku dauden zerga zuzenek, %7,6ko hazkundea izan dute, eta zerga nagusiak bilakaera ona ari dira erakusten aurten. Hala ere, gogoratu behar da uda ostera arte ez ditugula izango kanpaina nagusien emaitzak. Beraz, bitartean zuhurrak izan behar dugu", gaineratu du.
Errentaren gaineko Zergaren esparruan, lan atxikipenen atalean 14,2 milioi gehiago jaso ditu Gipuzkoako Ogasunak (%3,4 gehiago). Ondare irabazien gaineko atxikipenetan 2,2 milioi euro gehiago bildu dira. Aitzitik, bilakaera negatiboa izan da kapital higikorren etekinen atalean, 2,7 milioi gutxiago batu baitira. Halere, PFEZ bere osotasunean hartuta emaitza positiboa da, pasa den urtean baino 22,2 milioi gehiago batu dira eta (%6,6).
Sozietateen gaineko Zergari dagokionez, kuota diferentzial garbiak, enpresen irabaziak zergapetzen dituen kontzeptua, 5,9 milioi euro gehiago bildu ditu: sarrera gordinak 10,7 milioi euro gutxitu dira, eta itzulketak 16,6 milioi eurotan gutxi dira.
Azkenik, Gipuzkoako Aldundiak kudeatzen duen BEZari dagokionez, zerga bilketa metatua %0,3 igo da aurreko urtearekin alderatuta, hau da, 1,2 milioi euro gehiago bildu dira: 17,6 milioi euro igo dira sarrerak (%4,5) eta 8,9 milioi murriztu itzulketak (-%5,3). Bukatzeko, nabarmen egin dute behera lurraldeen arteko doikuntzak: 25,4 milioi euro gutxiago (-%20,2).
