DONOSTIA, 21 (EUROPA PRESS)
Chris Hemsworth antzezle australiarra 66. Donostia Zinemaldiko amaiera galan izango da, irailaren 29an, Drew Goddard zuzendariarekin batera, "Bad Times at the El Royale" filmaren Europa mailako estreinaldian. Pelikula horrekin bukatuko da aurtengo Sail Ofiziala.
Hemsworth Hollywoodeko egungo izarretako bat da, bereziki azken urteetan "Thor" edota "The Avengers" moduko filmetan parte hartu duelako, eta orain "Bad Times at the El Royale" bere azken lana aurkezten izango da Donostian, antolakuntzak jakinarazi duenez.
Drew Goddard estatubatuarrak zuzendutako bigarren filma da "Bad Times at the El Royale", 2012ko "The Cabin in the Woods" lan sarituaren ostean. "Cloverfield" (2008), "World War Z" (2013) eta "The Martian" (2015) filmetako gidoiak idatzi eta, besteak beste, "Lost" eta "Alias" telesailak ekoitzi ditu Goddard-ek.
Bere film berriak zazpi ezezagun elkartuko ditu Tahoe lakuan dagoen hotel narriatu batean, besteak beste, Jeff Bridges Donostia sariduna, Chris Hemsworth, Dakota Johnson ("Fifty Shades of Grey", "Suspiria") eta Jon Hamm ("Mad Men", "The Town").
Filmaren soinu banda Michael Giacchino-k konposatu du ("Jurassic World", "Coco", "Up"), eta Seamus McGarvey ("Godzilla", "Nocturnal Animals", "Darkest Hour") izan da argazki zuzendaria. 20th Century Fox konpainiak ekoitzi du lana, eta Hispano Foxfilm izango da Espainiako banatzailea. Azaroaren 16an estreinatuko da.
