O sistema de recoñecemento biométrico de Gradiant e Universidade de Vigo gaña unha competición internacional

Actualizado 10/06/2009 20:37:04 CET

VIGO, 10 Jun. (EUROPA PRESS) -

O sistema de recoñecemento biométrico --recoñecemento automático de caras-- creado polo Centro Tecnolóxico de Telecomunicacións de Galicia (Gradiant) e a Universidade de Vigo resultou gañador dunha competición internacional, segundo a resolución feita pública na International Conference on Biometrics (ICB) 2009.

Na cita, celebrada a pasada semana en Sardeña (Italia), o sistema galego quedou por diante doutros 18 proxectos creados por investigadores de toda Europa. O núcleo deste método é similar ao usado no control de acceso ás instalacións de Gradiant.

Esta foi a terceira vez que o grupo acudiu a unha competición de sistemas de recoñecemento biométrico. A súa participación nestes concursos comezou na Rede de Excelencia Biosecure e a eles pódense presentar investigadores de calquera nacionalidade e de modo libre.

A Universidade de Vigo participa nestas competicións internacionais dende o ano 2005, cando logrou a primeira posición entre 8 participantes nun evento celebrado en París. En 2007 o equipo repetiu éxito, logrando a primeira e segunda posición entre outros nove sistemas en Friburgo (Suíza). Agora, en 2009, logrou o seu terceiro triunfo tras acudir á cita italiana.

Por outra banda, dende o pasado maio, Gradiant forma parte do Subcomité Español de Identificación Biométrica. Segundo o doutor Daniel González, experto en biometría dentro do Centro Tecnolóxico de Telecomunicacións de Galicia, estar incluído no citado organismo é moi importante, xa que "ademais do recoñecemento que supón por parte da comunidade científica, axudará a estar ao día e ser visibles a nivel nacional e internacional".

Esta web utiliza cookies propias y de terceros para analizar su navegación y ofrecerle un servicio más personalizado y publicidad acorde a sus intereses. Continuar navegando implica la aceptación de nuestra política de cookies -
Uso de cookies