A Xunta destinará case 6,5 millóns de euros a apoiar a investigación básica no sistema público de I+D+i

Actualizado 23/03/2008 15:05:28 CET

SANTIAGO DE COMPOSTELA, 23 Mar. (EUROPA PRESS) -

A Consellería de Innovación e Industria destinará un total de 6.496.000 euros a dotar ao sistema público de I+D+i dos recursos necesarios para aproveitar as oportunidades de investigación básica, co obxectivo de "propiciar unha actividade investigadora de calidade capaz de competir a nivel internacional e incentivar a mobilidade dos investigadores galegos".

Con este fin, dentro do Programa de Promoción Xeral da Investigación (PXI) estableceranse catro modalidades de axuda para realizar proxectos de investigación básica para a elaboración de propostas ao VII Programa Cadro, para a organización de congresos e reunións científicas e para a asistencia a este tipo de eventos de carácter especializado. No caso destas dúas últimas liñas, o destinatario debe ser persoal investigador non vinculado ao Sistema Universitario Galego (SUG).

A partida económica máis ampla correspóndese coa realización de proxectos de investigación básica, para a que se subvencionarán dúas modalidades. Por un lado, as que supoñan un avance no coñecemento científico e, por outro, as que se dean en colaboración con dous ou máis equipos de investigación. A máxima contía que se concederá é de 120.000 euros para un período de tres anos.

En canto ao VII Programa Cadro, o seu obxectivo é promover a presenza dos investigadores galegos en proxectos de ámbito europeo, para o que se subvencionará a contratación temporal de persoal específico e a mobilidade dos membros do equipo de investigación. A axuda ascenderá a 12.000 euros se o solicitante lidera a proposta e de 6.000 euros no resto dos casos.

CONGRESOS.

O departamento que dirixe Fernando Blanco apoiará tamén aos centros públicos de investigación no sufraxio dos gastos derivados da organización de congresos para a difusión dos avances do coñecemento científico e da investigación que teñan lugar en Galicia. A cantidade a percibir dependerá do tipo de evento, aínda que en ningún caso superará os 6.000 euros.

Por outra banda, concederanse bolsas de axudas para asistencia a congresos e reunións científicas ao persoal investigador non vinculado ao SUG, a contía do cal dependerá do país no que teña lugar o evento, sen chegar a superar os 1.100 euros.

O prazo de solicitude para as axudas do PXI pechará o próximo 24 de abril, agás no caso das axudas á elaboración de propostas para o VII Programa Cadro, o prazo da cal rematará o 30 de xuño.

Esta web utiliza cookies propias y de terceros para analizar su navegación y ofrecerle un servicio más personalizado y publicidad acorde a sus intereses. Continuar navegando implica la aceptación de nuestra política de cookies -
Uso de cookies