Montse Prado asegura que a formación nacionalista "está en ascenso" e é a "opción"
SANTIAGO DE COMPOSTELA, 24 Mar. (EUROPA PRESS) -
O Bloque Nacionalista Galego (BNG) dará este sábado o "pistoletazo de saída" á precampaña electoral cunha convención municipal na que lanzará aos seus candidatos --que presenta no 90 por cento de municipios galego-- como única alternativa á "política de dereitas" de PP na Xunta e PSOE en Madrid.
Tamén acudirá a este acto cun 30 por cento de mulleres encabezando as listas aos distintos municipios galegos e con entre o 25 e 30 por cento de candidatos novos, menores de 30 anos. En ambos os dous casos, segundo a secretaria de Organización do BNG, Montse Prado, trátase de maiores porcentaxes fronte a 2007.
Actualmente, o BNG goberna nuns 63 municipios dos 315 concellos de Galicia e ostenta a alcaldía de 33. "Imos con grandes perspectivas, con mentalidade gañadora e a por todas", proclamou a tamén directora da campaña electoral no acto de presentación o evento deste sábado.
Deste xeito, os nacionalistas farán converxer este sábado o traballo realizado polos candidatos e a dirección, incluídos os actos de presentación de candidaturas que levou ao voceiro nacional, Guillerme Vázquez, a percorrer boa parte do territorio galego, co camiño da precampaña electoral que culminará o 22 de maio coa cita coas urnas.
Para Montse Prado "hai moito partido en xogo" e, ao respecto, a secretaria de Organización afirmou que a formación nacionalista "está en ascenso, recuperando posicións políticas".
O BNG, así, defenderá "un novo modelo económico" para Galicia e fará especial fincapé na lingua, dereitos sociais, a defensa do emprego --en contra da reforma das pensións--, e no "dereito" a manter o aforro galego.
Neste contexto, os nacionalistas preséntanse como "alternativa transformadora" e avisan de que a "outra opción" é a "política de dereitas de PP e PSOE". "O BNG é hoxe por hoxe a única forza que pode parar as políticas de dereitas e impedir que cheguen aos concellos", proclamou Montse Prado.
PROPOSTAS
O acto do sábado comezará na mañá dese día cun encontro entre o voceiro nacional e os candidatos menores de 30 anos, baixo o lema 'Propostas e experiencias de goberno'.
Xa pola tarde, será o acto central coa intervención de 15 candidatos e dirixentes políticos no acto final da convención, que pechará o propio líder nacionalista a partir das 18.00 horas no Pazo de Congresos, que ademais incluirá un espazo para explicar e potenciar as redes sociais.
"Non escondemos a marca, como fan outros," sinalou a secretaria de Organización ao mostrar os elementos que acompañan este evento como dous grandes 'bloques' nos que se reivindica a forza nacionalista "transformadora, pacifista e en contra da enerxía nuclear". "Esa é a forza do BNG", sentenciou.
