SANTIAGO DE COMPOSTELA, 27 Ene. (EUROPA PRESS) -
O corpo do home de 87 anos veciño do municipio de Ortigueira (A Coruña) desaparecido dende primeira hora da tarde do domingo foi atopado ás 16,30 horas deste martes no lugar do Chao, a dous quilómetro da súa casa, situada no lugar do Padornelo, na parroquia do Ermo.
Segundo informaron fontes de Protección Civil de Ortigueira a Europa Press, o home falecido foi atopado polos cans dunha asociación de Ferrol que se atopaba participando no rastrexo. O cadáver non presentaba signos de violencia, polo que se cre que o home, que tiña certos problemas de mobilidade e tamén algo de demencia, se desorientou.
A pista deste octoxenario perdeuse sobre as 15,00 horas do domingo, segundo informaron fontes do amplo dispositivo que buscou este home nas últimas horas.
Tras decatarse da ausencia activouse un dispositivo de busca no que participaron, entre outros, efectivos da Garda Civil, Policía Local, Protección Civil e integrantes do GES de Ortigueira. Ademais, familiares, amigos e veciños tamén colaboraron nas tarefas.
