SANTIAGO DE COMPOSTELA, 24 Jul. (EUROPA PRESS) -
Alternativa Galega de Esquerda (AGE) denunciou este xoves "a hipocrisía" dos partidos "turnistas", PP e PSOE, dado que un ano despois da traxedia ferroviaria en Angrois na que faleceron 79 persoas "non hai nin unha soa dimisión e todas as culpas recaen nun traballador", en referencia ao maquinista do Alvia.
Así mesmo, o deputado Antón Sánchez reprochou ao presidente da Xunta, Alberto Núñez Feijóo, que sexa "o protagonista" da entrega das Medallas de Ouro de Galicia, que este xoves concede a Xunta a vítimas, veciños e colectivos que realizaron tarefas de auxilio do accidente.
Nesta liña, Alternativa comunica que non participará en ningún acto oficial --aínda que mostra o seu respecto por todas as vítimas-- "pola dobre moral" de populares e socialistas, ao tempo que espeta o líder do Goberno galego: "O protagonista das entregas de medallas do señor Núñez é quen as entrega, non quen as recibe".
Así as cousas, AGE censura que todas as responsabilidades do accidente ferroviario recaian nunha persoa, "igual que no caso do Prestige, con Mangouras (capitán do buque) ou do Metro de Valencia", o que consideran "absolutamente indecente". "En ningún país europeo un accidente destas características quedaría resolto sen que ninguén asumise responsabilidades políticas", sentenza Sánchez.
Ao respecto, carga contra PSOE e PP porque "se tapan un ao outro para evitar dar explicacións e asumir responsabilidades", pois "se"poñen de acordo para bloquear a comisión de investigación e aínda ninguén, nin o Goberno do PSOE anterior nin do PP explicou o decisivo cambio do proxecto orixinal".
