Lamenta que "ninguén queira falar" no cinema de "temas tan pouco comerciais" como o desemprego ou a xente sen casa
SANTIAGO DE COMPOSTELA, 9 Oct. (EUROPA PRESS) -
O cineasta Aki Kaurismäki asegurou que Cataluña "non sabe unha merda" sobre independencia" e, fronte a iso, defendeu que Galicia si "debería ser independente" ao considerar que "mentalmente" éo "moito máis".
"Se despois sodes independentes, non me culpedes", manifestou tras ser preguntado polos xornalistas sobre a súa relación con Galicia, a onde acudiu para participar o en Festival Internacional de Cinema Curtocircuito que ten lugar en Santiago de Compostela.
Na sesión 'Rock & Shorts', o festival expón varios dos filmes musicais que Kaurismäki fixo coa banda Leningrad Cowboys. Esta unión deu como resultado a película 'Leningard Cowboys Go America (1989)' que tivo unha importante xira internacional. Antes dela chegarían propostas como 'Rocky VI' (1986), 'Thru the Wire' (1987), 'Rich Little Bitch' 1987, 'Those Were the Days' (1992) ou 'These Boots' (1993), todas incluídas no programa.
Segundo explicou o creador, estas pezas foron creada para "ir á MTV", aínda que "en 35 milímetros e cunha produción de tres días". "A maiores, os únicos curtos dos que podería falar sería de 'Guimarães' e 'Os cans non van ao inferno', explicou o finés, quen considerou unha "honra" poder estar neste festival para expoñer algúns dos seus traballos así como varias pezas doutros creadores que marcaron a súa traxectoria. Iso terá lugar na sección 'Signed by Aki K'.
"PIONEIRO"
Na súa intervención, tamén se referiu a algúns dos temas sobre os que versan as súas películas máis famosas, como a emigración, o desemprego, ou a xente sen casas, cuestións presentes en 'Le Havre', 'Nubes pasaxeiras' ou 'Un home sen pasado'.
Con todo, rexeitou que as súas obras sexan "pioneiras" en temas que están de actualidade en Europa, como o caso da emigración. "Probablemente non sexan pioneiras, pero si é certo que non hai moitas películas sobre este tema e quizais agora se farán máis", apuntou.
Fronte a iso, se considerou precursores os seus traballos sobre "o desemprego" ou "a xente sen casa". "Si creo que son pioneiras as miñas películas sobre o desemprego porque ninguén quere falar de temas tan pouco comerciais, ou de xente que non ten casa, non é o tema máis popular hoxe en día", indicou.
"RODAR CERCA DE CADA"
Na súa comparecencia ante os medios, na que estivo acompañado polo director de Curtocircuito, Pela do Chopo, e do alcalde de Santiago, Martiño Noriega, Kaurismäki non desvelou se traballa nestes momentos nalgún novo proxecto. "Estou a construír un invernadoiro na miña casa", respondeu ao ser cuestionado polos xornalistas ao respecto mentres daba unha calada un cigarro electrónico.
Así mesmo, preguntado pola súa intención de rodar unha nova película na cidade de Vigo, Kaurismäki explicou esta "é unha das súas ideas" e que responde á súa intención de filmar "preto da súa casa", situada na localidade portuguesa de Viana do Castelo.
"Vigo está preto de Viana do Castelo e a miña única idea é rodar o máis cerca de casa posible, quero comer e cear na casa", apuntou.
NOVA ETAPA DO FESTIVAL
No acto celebrado no Teatro Principal tamén interveu o rexedor compostelano, Martiño Noriega, quen definiu o creador finés como un director "capaz de entregar a utopía na impotencia" e o "humor na traxedia".
"O cinema de Aki é estoicismo, actitude e silencio", sinalou Noriega para destacar tamén que nas súas creacións estea presente "a clase traballadora nas súas penitencias europeas".
Por último, tras agradecer o apoio do Concello de Santiago e a Deputación da Coruña ao festival, Pela del Álamo recordou que Curtocircuito busca traer ao público todas aquelas obras ás que normalmente se pode acceder nos circuítos comerciais.
"Consideramos que temos a obriga ética de abrir novos camiños, de ofrecer ao público novas propostas que esperten conciencias, que mostren unha forma diferente de ver o mundo", asegurou.
