A CORUÑA, 22 Nov. (EUROPA PRESS) -
A Asociación pola Liberdade Afectiva e Sexual A.L.A.S. Coruña denunciou un caso de "agresión homófoba" nesta cidade por desavinzas entre un caseiro e o seu inquilino nas condicións dun aluguer, segundo sinala nun comunicado.
En concreto, sinala que este desacordo, que se produciu durante a tarde do pasado venres, "xerou tensións" que acabaron "con insultos homófobos" cara ao inquilino. Tamén afirma que lle ameazou cunha tesoira "con acabar coa súa vida". Inicialmente a vítima acudiu á Policía Local onde foi derivado para presentar a denuncia á Policía Nacional.
No seu comunicado, engade que, debido aos casos deste tipo que se producen "e ás dificultades que atopan as vítimas para atreverse a denunciar e á hora de formalizar as ditas denuncias", a asociación está a pór en marcha un Observatorio coruñés contra a LGTBIfobia.
CONCENTRACIÓN
Trátase dun proxecto enfocado ao "estudo das agresións que se producen na nosa comarca. Tamén ten como obxectivo "concienciar á cidadanía da importancia de denunciar estes actos e sensibilizala ante as expresións de odio en todas as súas formas, así como ofrecer atención ás vítimas".
Por outra banda, a asociación avanza que convocará unha concentración no Obelisco o próximo 10 de decembro, coincidindo co Día dos Dereitos Humanos "para pechar o ano denunciando unha vez máis as agresións ao colectivo LGTBI".
