Considera "tránsfuga" ao concelleiro do Grupo Mixto que a apoia e que concorreu ás eleccións polo PSOE
BOIMORTO (A CORUÑA), 3 Ago. (EUROPA PRESS) -
O alcalde de Boimorto, o nacionalista Xosé Luis Rivas Cruz, cualificou de "tufo mafioso" a moción de censura presentada contra el polos cinco edís do PPdeG e o concelleiro do Grupo Mixto José Beado Casal, que se concorreu ás eleccións municipais polo PSOE.
En declaracións a Europa Press, Rivas vinculou "coas altas esferas" do PPdeG a presentación desta moción, en alusión, en concreto, ao seu presidente, Alberto Núñez Feijóo, e ao secretario xeral desta formación, Alfonso Rueda.
"É unha manobra premeditada dende hai tempo e unha fraude electoral", sentenciou o alcalde, no día en que expuxo ante os medios de comunicación o seu posicionamento sobre o texto presentado, ante rexistro, polos promotores da moción.
Nel, argumentan que este concello vive unha situación de "inestabilidade" e recordan que o edil que foi nas lista dos socialistas, José Beado Casal, nunca chegou a estar nese grupo (pasou ao mixto directamente).
"É por iso que, os aquí asinantes, propoñen a presente moción de censura, ao alcanzar o PP a maioría dos votos con cinco concelleiros e aproximadamente un 44 por cento dos votos, que distan do 19 por cento obtido polo BNG", subscriben no texto e, en referencia, aos dous edís obtidos por este partido.
CASO DE TRANSFUGISMO
Fronte a este argumento, o alcalde sinalou que "hai un tufo pestilente polo medio". Ademais, considerou que o caso do edil do Grupo Mixto supón "transfugismo" polo que, na súa opinión, debería existir un pronunciamento por parte dos socialistas galegos. "Deste individuo, non vou opinar", dixo ao ser preguntado polo citado concelleiro.
No caso do PP, asegurou que os seus dirixentes deben clarificar "se xogan á democracia ou non". "O PP é un partido democrático, pero nel hai talantes e xente que de democracia non fan nada", sentenciou.
"Isto provén do PPdeG", insistiu tamén Xosé Luis Rivas, quen lamentou "a crispación" que, na súa opinión, xeraron os promotores da moción. "En Boimorto, volve haber medo a falar", apostilou o alcalde, quen admitiu, non obstante, que xa prevía "que isto ía suceder".
Con todo, dixo que esperaba que se producise "máis tarde", sinalou tras denunciar a existencia dunha reunión entre membros do PP de Boimorto e o actual concelleiro do Grupo Mixto "no mes de xaneiro", apuntou.
