SANTIAGO DE COMPOSTELA, 19 Dic. (EUROPA PRESS) -
O Concello de Santiago eliminou a Concellaría de Relacións Institucionais, unha área creada e asumida por Ángel Currás cando este deu o relevo a Agustín Hernández á fronte do bastón de mando. Precisamente, o agora rexedor asume estas competencias tras a marcha do seu predecesor no cargo e a entrada no goberno municipal da profesora universitaria Maite Cancelo.
No pleno celebrado este venres tomouse coñecemento da renuncia da concelleira socialista Mercedes Rosón, que aínda non foi substituído, se ben está previsto que a releve no cargo Álvaro González Álvarez tras a renuncia de Beatriz Acuña. Ademais, tomou posesión da súa acta Maite Cancelo, en substitución de Currás.
A chegada de Cancelo orixinou uns "pequenos axustes" no goberno, co fin de "repartir a carga de traballo", aínda que Agustín Hernández, na rolda de prensa posterior á xunta de goberno, destacou que o Concello funciona dende hai cinco meses con "normalidade", ao respecto do que argumentou que así o acreditan as 14 ordenanzas económicas aprobadas no pleno deste venres cos votos favorables do PSdeG e a abstención do BNG.
Así as cousas, Maite Cancelo xestionará a área de Educación e Xuventude, sen dedicación exclusiva nin parcial, facendo compatible a súa actividade co seu posto na Universidade de Santiago de Compostela (USC).
OUTROS CAMBIOS
Pola súa banda, Normalización Lingüística pasa á área de Cultura, que dirixe María Antón; e María Corral asume o departamento de Servizos Sociais e Deportes.
"É un axuste pequeno que trata de que sexa máis eficaz e eficiente" o funcionamento, destacou Agustín Hernández, quen tamén informou de que a nova concelleira non formará parte da xunta de goberno local.
Sobre a eliminación da Concellaría de Relacións Institucionais, Agustín Hernández limitouse a dicir que "foi necesaria", pero agora el asume as competencias que antes levaba, con dedicación exclusiva, Ángel Currás.
Por outro lado, o alcalde de Santiago agradeceu a "dedicación e o traballo" que realizou Mercedes Rosón, tanto no goberno presidido polo socialista Xosé Sánchez Bugallo, coma na oposición durante este mandato.
