O voceiro do PSOE municipal considera a proposta destinada a "satisfacer as necesidades" do PP
SANTIAGO DE COMPOSTELKA, 22 Ago. (EUROPA PRESS) -
O alcalde de Santiago, Agustín Hernández, insistiu na necesidade de "formular unha opción" sobre a reforma electoral ao respecto das eleccións locais, sobre a que os populares pretenden que goberne a lista máis votada, eliminando a posibilidade de coalicións tras as urnas.
Preguntado en rolda de prensa, Hernández volveu defender que, se o PSOE non quere negociar "nin agora nin nunca", o PP impulse en solitario a reforma.
En todo caso, recoñeceu que haberá que analizar o contido e alcance das modificacións, así como formular unha porcentaxe mínima para poder acceder á Alcaldía, así como a distancia que ten que haber coa segunda forza política máis votada.
Así as cousas, Agustín Hernández considerou que "non é normal" nun "pensamento lóxico" que o "máximo representante dun concello o sexa cun concelleiro sobre 25, por exemplo, e que outro grupo teña 12".
Por outro lado, ao respecto de se este cambio lle beneficiaría para lograr ser elixido nas eleccións do ano que vén, Agustín Hernández defendeu que el "non" traballa pensando nos comicios do 24 de maio, senón pensando en que hai "moitos problemas e retos".
"SATISFACER AS NECESIDADES" DO PP
En contraposición, o voceiro do PSOE no Concello compostelano, Paco Reyes, considerou que esta reforma está "clarísimamente" pensada para "satisfacer as necesidades" dos populares, ante a "caída" que, segundo dixo, se augura nos próximos comicios para o PP.
Ao respecto, sintetizou que se trata dunha reforma que impide as coalicións postelectorais e se pregunta se o PP acabará por facer o mesmo coas que se fan antes das eleccións tamén para evitar perder.
