Alcaldes do PP de Baixo Miño, Condado e Louriña piden que todos os afectados por preferentes recuperen o 100%

VIGO, 18 Jun. (EUROPA PRESS) -

Unha ducia de alcaldes do PP das bisbarras pontevedresas do Baixo Miño, Condado-Paradanta e Louriña asinaron un escrito no que manifestan o seu compromiso cos afectados polas participacións preferentes e obrigas subordinadas e solicitan que estes aforradores recuperen o 100 por cento do seu diñeiro.

En declaracións a Europa Press, o alcalde de Ponteareas, Salvador González Solla, explicou que este documento é froito de semanas de reunións entre os afectados e os rexedores e que, nel, se pide que os afectados poidan recibir o 100 por cento do diñeiro así como un compromiso para que as administracións traballen nese sentido.

Por iso, no documento solicitan á Xunta que siga coa arbitraxe e tamén solicita apoio para que os afectados poidan recuperar o seu diñeiro a través da vía xudicial.

Segundo explicou Solla, o escrito tamén incluía dirixirse ao Goberno central para a eliminación da quita, se ben, segundo indicou, finalmente a quita foi establecida e agora "non hai marcha atrás".

O documento foi asinado polos rexedores populares, os cales pediron aos afectados polas preferentes que permitan que se desenvolvan os plenos municipais, tendo en conta que as protestas dos aforradores obrigaron a suspender numerosas sesións.

"Se non os concellos se bloquean", indicou Solla, quen convocou para a tarde deste martes un pleno ordinario que inclúe a aprobación do Plan Xeral de Ordenación Municipal (PXOM). O plan xa se levou a pleno o pasado mes de marzo, se ben finalmente a sesión foi suspendida polas protestas e o goberno saíu do Concello escoltado polas forzas de seguridade.

AFECTADOS

Pola súa banda, fontes dos afectados polas preferentes explicaron a Europa Press que, unha vez que se conta co documento, analizarán qué decisión toman ao respecto das súas protestas. En todo caso, aseguran que irán ata o pleno deste martes e "valorarán que facer".

Os afectados consideran que o escrito "é positivo", se ben indican que hai contidos que "non concordan co que está a pasar estes días", nos que se anunciou o final das arbitraxes e a imposición de quitas. Por iso, insisten en que van analizar a situación.

Por outra banda, na mañá deste martes un grupo de afectados permaneceu concentrado dentro das oficinas de Novagalicia Banco en Ponteareas, onde mantivo unha reunión con directivos desa sucursal. Posteriormente o grupo foi desaloxado pola Garda Civil e decidiu continuar a concentración no exterior do recinto.