(AMP.) Alimentos Lácteos entra en concurso avalada pola Xunta, que "non escatimará esforzos" para salvala

SANTIAGO DE COMPOSTELA, 24 May. (EUROPA PRESS) -

O xerente de Alimentos Lácteos, Miguel Martín, confirmou que a empresa de base cooperativa presentará o concurso de acredores entre este venres e o luns, cando remata o prazo legal establecido. Pola súa banda, a Xunta de Galicia comprometeu que "non escatimará ningún tipo de esforzo por garantir o proxecto".

Os responsables do consello de administración de Alimentos Lácteos, representantes das cooperativas gandeiras que abastecían de leite á fábrica de Outeiro de Rei (Lugo) ata a suspensión de actividade que motivou a entrada en preconcurso --a finais do mes de xaneiro-- e os conselleiros de Medio Rural e do Mar, Rosa Quintana, e de Economía e Industria, Francisco Conde, mantiveron unha reunión este venres no complexo administrativo de San Caetano, ante "o inminente do esgotamento do prazo para a presentación do concurso".

Á saída, Miguel Martín afirmou que a entrada en concurso "é inevitable" pero destacou que o proceso non contempla unha proposta de liquidación senón que a vontade é "buscar unha solución para poder obter o financiamento e a participación do socio industrial, que é o que se está a tratar de conseguir dende hai catro meses".

Pola súa parte, o responsable de economía e industria, Francisco Conde, afirmou que o Goberno galego está "dende logo" disposto a conceder novos avais pero condicionou a devandita posibilidade a que exista "un proxecto industrial". "A clave é que exista ese proxecto, unha implicación por parte dun socio industrial que xestione o proxecto que sexa capaz de canalizar a produción de leite", resaltou.

"XIRO" DE PASCUAL

Ao respecto do socio industrial necesario, o xerente de Alimentos Lácteos indicou que "houbo contactos" con diferentes industrias e, agora, "hai propostas que están pechadas porque non interesaban e outras que seguen abertas e continuarán". "O propietario da planta --Leite Pascual-- sempre estivo aí e ofrece un apoio que ten que validar", agregou.

Sobre Pascual, Conde lamentou que dera un "xiro moi importante" porque, despois de trasladar "no seu momento que si estaba comprometido co proxecto, cambiou a súa postura" e "a súa proposta" e "non está disposto a apostar por Alimentos Lácteos". De feito, o titular do departamento autonómico vinculou con esta decisión a necesidade de presentar o concurso, xa que "este cambio de postura do socio industrial fai inviable o proxecto".

EQUIPO E GANDEIROS

No que respecta aos 83 traballadores inmersos na aplicación dun ERE suspensivo, o xerente da empresa garantiu que "nada" cambia coa nova situación, posto que a medida "está formulada con data de finalización final de ano". "Non imos extinguir contratos nin cancelar o ERE porque imos seguir traballando na solución", subliñou.

Sobre as débedas que mantén a compañía coas cooperativas, o responsable da sociedade recoñeceu que habería que chegar a un acordo" pero circunscribiuno ao "mesmo plan": "Necesitamos leite, financiamento, a planta e un acordo cos traballadores", resumiu.

Os gandeiros están comercializando o leite neste momento con diferentes industrias "e afortunadamente o prezo estase a recuperar", o que "está a axudar a que teña saída", apuntou. Non obstante, "se a industria empezase a funcionar de novo, as cooperativas teñen compromisos que terían que renovar, claro", engadiu.

NECESIDADE DE CIRCULANTE

Cunhas débedas acumuladas que roldan os 15 millóns de euros, Martín resaltou que o "problema" da planta de Outeiro de Rei "non é tanto de débeda que haxa que pagar coma de circulante suficiente para que funcione o negocio".

Así, chamou a atención sobre que a fábrica "necesita volumes moi elevados" de leite para funcionar "e ser rendible" e iso, incidiu, "require circulante que agora mesmo non se ten".

"A Administración trasladounos que segue apoiando unha opción viable do proxecto se somos capaces de atopala entre todos. E as cooperativas sempre cumpriron os seus compromisos e seguen manténdoos porque ademais a empresa é súa", explicou.

POLO MENOS TRES MESES

O plan futuro que trazará o administrador concursal que agora "entrará en xogo" prevé avais, novo financiamento e toda "unha serie de figuras financeiras", apuntou o xerente, antes de advertir de que "a banca ten que estar presente".

Ao seu xuízo, o proceso desenvolverase con "outras regras que nalgún sentido si que facilitan, ao mellor, determinadas quitas ou aprazamentos que agora esixían avais" que Alimentos Lácteos non foi "capaz de proporcionar". Así as cousas, fixou o prazo de "polo menos tres meses" para lograr unha resolución positiva a esta crise, se é que non se fose á liquidación", que "non é a vontade nin a intención de ninguén".