Miguel Santalices pediu unha "Europa máis social" e mencionou varios colectivos nun acto que recordou ás vítimas de Angrois
SANTIAGO DE COMPOSTELA, 25 Jul. (EUROPA PRESS) -
A situación política en España, coa necesidade dunha "moralidade incualificable" e de que os gobernantes "entren en diálogo" para a conformación dun Goberno estable e solucionar as súas diferenzas; e a loita pola "erradicación" do terrorismo e as súas causas de raíz, foron as polas sobre as que xirou este luns a Ofrenda Nacional ao Apóstolo Santiago.
Como é habitual, a actualidade colouse novamente nos discursos tanto do delegado rexio e oferente, Miguel Ángel Santalices, coma do arcebispo de Santiago, Julián Barrio, que coincidiron en pedir o apoio do Apóstolo para as vítimas do terrorismo e as guerras, para os afectados pola crise e para os gobernantes, no seu camiño para ofrecer unha política estable e de "entendemento".
As celebración en Compostela comezou en torno ás 10,00 horas, co pase de revista ás tropas por parte do delegado rexio, o presidente do Parlamento, Miguel Santalices, ao que seguiu a tradicional procesión de autoridades civís dende o Pazo de Raxoi ata a Catedral de Santiago.
Ao acto, que tivo lugar nunha soleada Praza do Obradoiro moi concorrida de turistas, compostelanos e curiosos; asistiron o delegado do Goberno en Galicia, Santiago Villanueva, o presidente da Xunta, Alberto Núñez Feijóo, varios conselleiros, o presidente do TSXG, Miguel Ángel Cadenas, e representantes municipais do PP e PSOE, así como autoridades culturais, civís e militares. Á saída, un grupo de manifestantes pediu, o paso da comitiva, apoio para a sanidade pública e o "rescate" do Hospital Álvaro Cunqueiro de Vigo.
"CONCORDIA" NO ÁMBITO POLÍTICO
As dificultades políticas que atravesou e atravesa España coláronse na Ofrenda ao Apóstolo de Miguel Santalices que, ademais, pediu ao Santo por numerosas problemáticas e colectivos.
Durante a súa intervención, Santalices pediu ao Apóstolo "acerto para os que lexislan e para os que asumen a responsabilidade de gobernar", así como para os que "asuman esa responsabilidade nun futuro inmediato", co obxectivo de que poidan facelo "na mellor concordia e sabedoría, buscando o ben común, mellorando as deficientes situacións políticas, económicas e sociais".
Ante o Apóstolo, Santalices "recoñeceu os erros cometidos" e instou aos políticos a actuar "dende unha honradez e moralidade incualificables".
Máis alá, reivindicou a "política con maiúsculas" e "rexeitou con contundencia calquera comportamento indebido", ao tempo que pediu unha acción política que "procure o entendemento e se afaste de calquera tentación excluínte ou totalitaria".
TERRORISMO E GUERRAS
Nun "momento de enormes tensións sociais, intelectuais e políticas", Miguel Santalices pediu ao Apóstolo que "guíe" á sociedade "coa súa luz" no camiño "da convivencia e da paz, da cordura e do entendemento", para afrontar as situacións de "convulsión mundial, de enfrontamentos e guerras, de odios e de abusos a persoas maiores, mulleres e nenos".
Santalices recordou aos que "padecen inxustizas, persecución e tiranías limitadoras," como acontece cos que son "vítimas de culturas e réximes políticos inadecuados, incapaces de asumir, con intelixencia e realismo, os mellores logros do progreso da humanidade".
Ante o Apóstolo, instou a "alzar a voz" fronte ás "situacións crudelísimas do terrorismo e das guerras", que producen "danos, mortes, desolación e forzadas migracións expatriadoras cuxos efectos repercuten inexorablemente en moitas partes do mundo".
Así mesmo, reclamou que se "siga poñendo atención, con máis intensidade se cabe, ás persoas e ás súas necesidades", para crear "unha Europa máis social".
PROBLEMAS SOCIAIS
No seu discurso como oferente, tiveron cabida os maiores, as mulleres vítimas de violencia de xénero, as persoas que "perderon o seu traballo e a súa vivenda castigados por unha situación económica desvastadora", os mozos que buscan emprego e os emigrantes.
Do mesmo xeito, tamén pediu a protección do Apóstolo para os enfermos, especialmente para as persoas que sofren unha enfermidade mental e para as súas familias, "danmificados pola incomprensión", e para os que "padecen algún tipo de minusvalidez".
Así mesmo, tivo palabras de recordo para as vítimas da "traxedia" de Angrois e recoñeceu o labor de profesionais sanitarios, docentes e restantes traballadores de servizos públicos, "sempre merecedores de respecto", así como aos integrantes das Forzas de Seguridade do Estado.
Para concluír, Miguel Santalices fixo mención da celebración do centenario das Irmandades da Fala e reivindicou a cultura e a lingua galegas, un "tesouro" para o que pediu á Igrexa que "acentúe a súa sensibilidade".
ENTRAR NUN "AUTÉNTICO DIÁLOGO"
Tamén o arcebispo de Santiago, Julián Barrio, fixo unha referencia durante a Homilía desta celebración á situación política en España e reclamou que o Apóstolo "interceda" polos gobernantes para que "saiban entrar nun auténtico diálogo".
Durante a súa réplica á Ofrenda, monseñor Barrio mencionou tamén a "crise humanitaria, moral e relixiosa de Europa" para reivindicar a fe como arma para "erradicar as causas das que emerxen guerras, odio, terrorismo e penurias cotiás".
Así mesmo, recordou que a tradición cristiá "amparou a dignidade da persoa e os seus dereitos fundamentais", apuntando que os Apóstolos "entaboaron un diálogo cos diferentes pobos e culturas, orientado a sanar as raíces profundas do mal e non as súas aparencias".
"A luz desa fe motívanos a erradicar as causas das que emerxen guerras, odio, terrorismo e penurias cotiás", dixo o arcebispo, para quen "sen a coraxe moral que fai saír do escepticismo, a sociedade non poderá superar os momentos de crise".
Tras lamentar a "perda da memoria e da herdanza cristiás" que sofre Europa, monseñor Barrio instou a "revitalizala" para, tendo en conta ás persoas que sofren", "asumir con tanta dignidade como fidelidade este momento histórico e a xerar un ámbito cultural que non peche os seus ollos á luz da fe no medio de tanta sospeita e desconfianza".
Para concluír, o arcebispo tivo palabras para a "sombra de dor" que tingue esta celebración, co terceiro aniversario do accidente ferroviario de Angrois, e pediu ao Apóstolo por "todas aquelas persoas que están a ofrecer os seus mellores esforzos para responder ás esixencias do ben común e construír unha sociedade mellor".
