PSOE e BNG presentan unha moción de censura en Porto do Son (A Coruña) ante a "nefasta xestión" do goberno do PP

   SANTIAGO DE COMPOSTELA, 6 Nov. (EUROPA PRESS) -

   O socialista Xoán Pastor Rodríguez e a nacionalista Ánxela Franco ostentarán os cargos de rexedor e tenente de alcalde, respectivamente, no municipio coruñés de Porto do Son unha vez que se debata a moción de censura contra o alcalde do PP que rexistraron hoxe ambas as dúas formacións ante a súa "nefasta xestión".

   Segundo confirmaron a Europa Press fontes do PSdeG e do BNG, esta moción presentouse para contrarrestar a "ineficacia" do goberno local do PPdeG e á vista de que os presupostos da Xunta "anulan" proxectos comprometidos para este concello.

   Deste xeito, a secretaria de Acción Municipal do PSdeG, Mar Barcón, asegurou, en declaracións a Europa Press, que este pacto ten un dos seus piares na necesidade de "non desperdiciar" as partidas que recibirá Porto do Son do novo Fondo de Cooperación Local.

   A futura tenente de alcalde, Ánxela Franco, explicou que "había que buscar unha fórmula fronte á ineficacia e desleixo" co que "estaba a actuar" o goberno do PP e puxo como exemplo diso a non aprobación dun plan de ordenación municipal ou dos presupostos.

   Así mesmo, expresou que a cidadanía "estaba desilusionada" co rumbo do goberno local, o que sumado ao borrador de presupostos da Xunta e á "ineficiencia" do municipio, levou a socialistas e nacionalistas a iniciar as negociacións para elevar un goberno de "esquerdas e con capacidade de diálogo coas demais forzas".

ELECCIÓN ALCALDE

   Segundo os socialistas, o BNG "quería a Alcaldía" para a súa formación, o que motivou o atraso para este acordo, dado que a executiva galega do PSdeG rexeitaba este extremo. A maiores, os nacionalistas "opoñíanse" a que o anterior alcalde socialista, Ramón Quintás, volvese rexer o concello, o que enrocou as conversacións entre ambas as dúas forzas.

   Así, Mar Barcón destacou a "mostra de xenerosidade" do ex alcalde de Porto do Son, quen dirixiu o concello 12 anos, ao propiciar que outro socialista fose o candidato. De feito, asegurou que esta situación "facilitou o acordo" final, no que aínda "faltan uns fíos" por pechar ao respecto da repartición competencial, segundo indicaron fontes do Bloque.

   Ao respecto deste obstáculo, Ánxela Franco explicou que, na campaña electoral das municipais, o BNG comprometérase a non pactar co candidato socialista, polo que os nacionalistas "cumpriron" a súa promesa cando "se presentou a oportunidade de facelo".

   Para o futuro tenente de alcalde e que tamén será a voceiro do goberno local, unha das principais "prioridades" será a aprobación do plan de ordenación urbana, para o que garantiu "diálogo" coas forzas sociais e o resto de grupos municipais.

CORRELACIÓN FORZAS

   Tras as eleccións municipais do 2007, a corporación municipal quedou integrada por seis concelleiros do PP, cinco do PSOE, catro do BNG e dous independentes. A falta de acordo entre nacionalistas e socialistas propiciou a alcaldía de Manuel Tomé co apoio dos independentes.

   Para o secretario de Acción Municipal do BNG, Manuel Antelo, esta moción de censura trátase dunha "reposición do acordo" entre socialistas e nacionalistas no municipio.