AMPL.- Sindicatos estiman que 123 empresas e 8.000 traballadores de automoción beneficiaranse do plan da Xunta

VIGO, 18 Nov. (EUROPA PRESS) -

Os sindicatos estimaron hoxe que unhas 123 empresas poderán acollerse ás axudas do plan no que traballa a Xunta para "aliviar" os efectos da crise e "mitigar" o seu impacto sobre o emprego no sector do automóbil e que uns 8.000 traballadores beneficiaranse desta iniciativa.

Así o indicaron tras a reunión do Foro da Automoción celebrada hoxe en Vigo entre sindicatos, patronal e Consellería de Traballo, co fin de perfilar os criterios que deben seguir as empresas para acollerse en decembro ás axudas da Xunta para formación, e evitar máis perda de empregos no sector da automoción.

Segundo afirmou o voceiro de CIG Metal, Miguel Anxo Malvido, os requisitos a cumprir polas empresas céntranse en que non poden presentar ningún Expediente de Regulación de Emprego (ERE); teñen que demostrar que, polo menos, un 40 por cento da súa produción está destinada ao sector da automoción; deben presentar un informe de actividades e unha lista nominal de empregados.

Pola súa parte, responsable do sector de compoñentes de automoción de CCOO-Galicia, Celso Carneiro, apuntou que os programas de formación "dependerán do perfil de cada empresa" e recordou que, dentro desta industria, hai factoría dedicadas a múltiples actividades "dende a electricidade á robótica". En todo caso, engadiu que se trata de plans de formación para empresas "que están afogadas e non teñen máis medidas de flexibilidade", co fin de "evitar que haxa máis EREs".

Así mesmo, recordou que, aínda que a Xunta baralla axudas, aínda non se concretou a cantidade e se fala dunha partida de entre 6 e 10 millóns de euros. Tamén precisou que este plan se implementar para o mes de decembro, cando se prevé "a grande focha" no sector, e que todos os axentes sociais e económicos deberán seguir traballando para articular medidas a partir de xaneiro".

CAMBIO DE POSICIÓN DA XUNTA

O responsable de automoción de UGT-Galicia, Rubén Pérez, subliñou o "compromiso e vontade expresa" da Administración de manter o diálogo aberto na mesa de negociación do Foro da Automoción, e recordou que o próximo venres haberá unha nova reunión en Santiago de Compostela.

Ademais, referiuse ao cambio de actitude da Xunta, á que os propios sindicatos acusaran de "falta de sensibilidade" co sector nas últimas semanas. A ese respecto, recoñeceu que, dende o pasado luns, "houbo un cambio de tendencia", pero sinalou que "ese cambio tería que ser dende hai máis tempo, porque se sabía que había un problema real".