Beiras critica que forzas con reivindicacións comúns non cheguen a acordos nun acto presenza de numerosas organizacións sociais
SANTIAGO DE COMPOSTELA, 25 Jul. (EUROPA PRESS) -
A formación nacionalista Anova centrou o seu acto organizado con motivo do Día da Patria, celebrado este 25 de xullo, na defensa de candidaturas de "base cidadá" para os próximos comicios municipais e apostou por unha política de alianzas "asesada", na que "cada forza política" non pretenda "manter fixos os marcos do seu terreo".
"Iso é o que pretendemos, e as municipais non deben ser unhas eleccións preparadas convencionalmente, mediante acordos por arriba, senón que deben ser candidaturas de base cidadá, de unidade popular, nas que sexa o pobo quen máis ordene," explicou o voceiro nacional de Anova, Xosé Manuel Beiras.
Deste modo, defendeu que "a cidadanía", a través das plataformas e organizacións sociais, está "máis preparada que as forzas políticas" para "cambiar o réxime actual" en descomposición" e "romper coa segunda restauración borbónica". "A miña experiencia no Parlamento corrobora isto, pasa en todos os niveis", lamentou antes de asegurar que "onde si existe democracia é na sociedade civil".
Para lograr esta "quebra democrática", ao seu xuízo, as organizacións políticas "deben funcionar como ferramentas da maioría social agredida para orientala e apoiala, pero sen controlala, a ser a protagonista".
"Estou convencido de que a cidadanía é a que mellor preparada está, e se non logra que sexa un movemento na totalidade do pobo é pola presión que exerce a política institucional, polo estupefaciente lanzado polo aparato ideolóxico do réxime e tamén pola contribución que fan as forzas políticas que non logramos poñernos de acordo", considerou.
"MINIFUNDISMO" DAS FORZAS POLÍTICAS
A este respecto, Beiras lamentou que as organizacións políticas de esquerda rupturista e nacionalista galegas non logren "poñerse de acordo" en reivindicacións comúns. "Sempre estamos a dicir que coincidimos, pero logo pasa iso, o minifundismo, preocuparse por que non se movan os marcos ou manter o tabú de fronteiras que nós xa rompemos hai dous anos con Alternativa Galega de Esquerda (AGE) e que volvemos romper nas europeas".
"Non abonda con que o fagamos nós, senón que ten que ser algo que o faga o conxunto", indicou antes de insistir en que as municipais necesitan que se inicie "un proceso de impulso e apoio a todos os focos activos da cidadanía" como o movemento cidadán Marea Atlántica ao que saudou "con fraternidade". "Candidaturas de cidadáns de base, na que nos incluímos pero sen pretensións de poñer por diante a cabeceiras de listas", indicou.
"PARTE DA LOITA, NON A TOTALIDADE"
Esta chamada á unidade das forzas de esquerda rupturista para e lograr candidaturas tamén foi realizada polo coordinador nacional de Anova, Martiño Noriega, quen considerou necesario crear unha "fronte popular" contra as políticas da dereita. "Estamos aquí hoxe para tecer a nación como un espazo inclusivo de dereitos roubados", manifestou.
"Dende Anova fixemos un chamamento a configurar candidaturas populares nos concellos de Galicia, baixo un programa de mínimos e cunha metodoloxía aberta e participativa por definir. Porque nos entendemos parte da loita, e non a totalidade", proclamou.
PRESENZA DE DIVERSOS COLECTIVOS
Precisamente, para facer visible este "protagonismo" da cidadanía no proceso de "ruptura democrática co actual sistema", no acto que a formación que dirixe Xosé Manuel Beiras celebrou en Santiago tomaron a palabra diversos colectivos e movementos sociais.
En primeiro lugar, unha das voceiros da Plataforma Galega polo Dereito ao Aborto, Pilar Estévez, defendeu o dereito das mulleres a decidir sobre os seus corpos e cargou contra a reforma "ideolóxica" da lexislación que prevé levar a cabo o ministro de Xustiza, Alberto Ruíz-Gallardón. "Os dereitos están para usar, e o dereito a ser nai pasa polo dereito a non o ser", indicou.
Tamén explicaron as súas reivindicacións colectivos como Stop Desahucios, Valadre, ou a Plataforma pola auditora da débeda, que defende estudar todas as débedas das administracións públicas, dende as contraídas polas locais ás autonómicas ou estatais.
PRESENZA DOS REIS
Durante o acto organizado por Anova na Praza 8 de marzo da capital galega, tamén houbo críticas á presenza dos Reis de España, don Felipe e dona Letizia, este venres en Santiago de Compostela, a onde se trasladaron para acudir á tradicional ofrenda ao Apóstolo Santiago.
Así, Beiras criticou o forte despregamento policial habilitado na capital galega con motivo da presenza dos Reis. "Parece que estamos en Vietnam outra vez, só porque está Borbón aí, que a ninguén lle interesa nin lle quere facer mal, solo que se vaia dunha puñetera vez, que colla un barco, unha canoa ou un avión, deses que non funcionan nunca, e a ver se se equivocan outra vez os ucraínos e lle dan cun mísil", afirmou.
