As Infraestruturas e intercambios empresariais centran a axenda de Feijóo co presidente e primeiro ministro luso

LISBOA (PORTUGAL), 29 (Da enviada especial de Europa Press, Beatriz Vila Couto)

As infraestruturas, e en concreto a conexión da alta velocidade, xunto cos intercambios económicos e comerciais entre Portugal e Galicia centrarán hoxe a axenda do máximo mandatario galego, Alberto Núñez Feijóo, que se reunirá en Lisboa co presidente e o primeiro ministro luso, Aníbal Cavaco e José Sócrates, respectivamente.

Así, o xefe do Executivo autonómico continúa hoxe a súa visita á capital portuguesa, despois de visitar o Centro Galego de Lisboa, onde considerou que o "futuro" da eurorrexión galaico-portuguesa pasa polos intercambios económicos.

Núñez Feijóo comezou onte o seu periplo internacional no país veciño cunha visita ao centro galego onde quixo deixar para hoxe os temas que "preocupan a Galicia", entre os que situou o paro ou as infraestruturas. "Mañá (por hoxe) falaremos de empresas transfronteirizas, de infraestruturas, da AVE, ...", asegurou no seu discurso ante os asistentes ao centro galego.

Así, o máximo mandatario autonómico leva na súa axenda, ademais das infraestruturas, o desenvolvemento de clústers empresariais, o emprego ou o gas e electricidade entre ambos os dous lados do Miño, xunto con outros asuntos.

PROGRAMA

Feijóo ten previsto reunirse a partir das 11.30 horas (portuguesa) co presidente da República de Portugal, Anibal Cavaco, no Pazo de Belem e, posteriormente, sobre as 13.00 horas (local) con empresarios nunha conferencia baixo o epígrafe 'As oportunidades de comercio e investimento en Galicia e Portugal'.

Finalmente, a visita á capital lusa concluirá cun encontro do xefe do Executivo galego co primeiro ministro luso, José Sócrates, e que terá lugar no Pazo de Sao Bento a partir das 16.00 horas (en Portugal).