Asime chama ao sector naval de Pontevedra a "desenvolver a súa actividade con normalidade" a pesar da folga do mércores

   A Asociación de Industriais Metalúrxicos de Galicia (Asime) chamou hoxe aos traballadores do sector naval da provincia de Pontevedra a "desenvolver a súa actividade con normalidade" durante a xornada de folga convocada pola CIG para este mércores.

   A través dun comunicado, esta organización empresarial, que aglutina 270 compañías, quixo "invitar a empresarios e traballadores" a exercer o seu dereito ao traballo e pediulles que non se "deixen intimidar" polo sindicato nacionalista, de tal forma que poidan desempeñar as súas funcións "con liberdade"

   Asime tamén reiterou a súa "máis profunda indignación" e "repulsa" a este paro porque, segundo mantén, a CIG "distorsiona" a información para "manipular" aos traballadores e recordou que a convocatoria de folga corre "unicamente" a cargo da central nacionalista.

   Igualmente, considerou "inadmisibles" as acusacións "baseadas en sospeitas" do sindicato relativas á contratación de man de obra estranxeira con perores condicións laborais e chamou a denuncialas ante a Inspección de Traballo.

   Por último, atribuíu estas "actuacións" da CIG, que ao seu xuízo "prexudican seriamente" ao sector, á existencia de conflitos internos na plataforma nacionalista e pediu que os traballadores exerzan a súa liberdade de expresión e o seu dereito á folga "dende a responsabilidade".