FERROL, 24 Abr. (EUROPA PRESS) -
Os colectivos ecoloxistas Adega, Verdegaia e Sociedade Galega de Historia Natural (SGHN) alertaron este xoves de que a ría de Ferrol seguirá contaminada tras a finalización das obras de saneamento e que sufrirá "preto de 350 verteduras ao ano".
Así recóllese no estudio 'A ría de Ferrol e o seu saneamento, presente e futuro', elaborado a raíz das xornadas organizadas polas entidades ecoloxistas, xunto coa asociación de veciños El Pilar, nas que se analizaron as obras de saneamento que se están a executar.
Alexandre Carrodeguas, representante de Verdegaia, alertou de que "non se vai lograr o saneamento integral da ría como está a vender o Partido Popular" e se manterá un nivel de calidade de augas de zona B en lugar do óptimo de zona A.
Os colectivos ecoloxistas argumentan que o principal motivo é que se están a construír redes unitarias de augas pluviais e fecais, en lugar de redes "separativas", que son as que se están a implantar "nas cidades europeas". Este sistema provocará, segundo as asociacións, que se manteñan as verteduras á ría.
Ademais, a existencia de numerosas verteduras acumuladas na ría, sumada "á nefasta xestión de residuos", evitará, en opinión de Adega, que se logren depurar as augas unha vez que entre en vigor a rede completa de saneamento.
Por este motivo, reclamaron que se modifiquen as actuais redes unitarias, ao consideralas un sistema "totalmente obsoleto", por outras separativas "e que non se minta aos cidadáns" sobre o resultado dos traballos de depuración.
