SANTIAGO DE COMPOSTELA, 21 Oct. (EUROPA PRESS) -
O ladrón confeso do Códice Calixtino, José Manuel F.C., será xulgado o próximo día 15 de xaneiro polo suposto roubo de cartas aos seus veciños.
Segundo informou o Tribunal Superior de Xustiza de Galicia (TSXG), está sinalado para o 15 de xaneiro ás 9,30 horas o xuízo no Xulgado do Penal Número 1 de Santiago por supostamente roubar cartas aos seus veciños.
Pola súa banda, o xuízo pola subtracción do Códice Calixtino aínda non ten data fixada. De feito, o pasado mes de setembro a Sección Sexta da Audiencia Provincial da Coruña desestimara o recurso de apelación interposto pola defensa do presunto autor do roubo do Códice Calixtino no asunto da subtracción de cartas a veciños e ratificaba a apertura de xuízo por estes feitos.
O autor confeso do roubo do Códice presentara un recurso de apelación contra o auto de transformación en procedemento abreviado --auto co que se pon fin á instrución-- no asunto do roubo de cartas a veciños.
No auto da Audiencia da Coruña, "considérase razoado e ponderadas todas as circunstancias tidas en conta polo xuíz", polo que confirma os autos recorridos do 21 de xaneiro deste ano e do 17 de marzo.
Argumentaba a Audiencia Provincial da Coruña que "a xuíz de instrución decreta o paso do procedemento a abreviado contra o imputado por posible delito de descubrimento de segredos, ao estimar que existen indicios abondos na causa para continuar o procedemento, sen que o auto de transformación teña efecto suspensivo".
"A Sala estima que a valoración que se realiza polo instrutor neste momento procesual está acorde coas dilixencias practicas en sede de investigación", sinala e engade que carece "o recurso de reforma de carácter suspensivo".
