SANTIAGO DE COMPOSTELA, 27 Ago. (EUROPA PRESS) -
A maioría do Grupo Parlamentario do PPdeG bloqueou a comparecencia en pleno do presidente da Xunta, Alberto Núñez Feijóo, para abordar a negativa á construción dun dique flotante na ría de Ferrol, e advertiu á oposición de que "non busquen en Alemaña as explicacións", senón no PSOE.
Durante o debate, na deputación permanente, dunha petición de comparecencia formulada por BNG e AGE, os grupos da oposición lamentaron que, con motivo da visita da chanceler alemá, Angela Merkel, o presidente do Goberno central non introducise as dificultades do sector naval na axenda da reunión.
Tanto o voceiro do Grupo Parlamentario do BNG, Francisco Jorquera, como a vicevoceira de AGE, Yolanda Díaz, acusaron os populares de realizar a consulta informal á Unión Europea para buscar unha "coartada" e unha "escusa" para non levar a cabo este proxecto.
Mentres, o representante dos socialistas, José Luis Méndez Romeu, censurou as "explicacións puerís" da Xunta e ironizou que co cambio do comisario de Competencia -- actualmente Joaquín Almunia-- vanse solucionar todos os problemas de Galicia.
Por parte dos populares, Miguel Tellado reafirmouse en que o actual Goberno foi o que "máis fixo" polo naval en Ferrolterra, e culpou a "Unión Europea" de que non se poida construír o dique flotante. "Non busquen en Alemaña as explicacións que teñen nesta sala", sentenciou, dirixíndose aos socialistas.
(HABERÁ AMPLIACIÓN CON FOTO)
