O AVE conectará Santiago con Ourense en 38 minutos por 13,5 euros

SANTIAGO DE COMPOSTELA, 11 Nov. (EUROPA PRESS) -

Renfe puxo á venda os billetes para a nova liña de Alta Velocidade Ourense-Santiago-A Coruña, que se inaugura o próximo 10 de decembro. Dende ese día, a capital galega e a cidade de As Burgas quedarán conectadas en 38 minutos por 13,5 euros.

O percorrido Santiago-Ourense pasará dos 94 minutos actuais a 38; mentres que o de A Coruña-Santiago realizarase en 28 minutos, sete menos que na actualidade (35). A viaxe completa, entre A Coruña e Ourense, reducirase en 67 minutos, ata os 68.

"A Coruña e Ourense pasarán a estar a pouco máis dunha hora, cando actualmente o percorrido se realiza en 2 horas 15 minutos", destaca o Ministerio de Fomento nun comunicado.

O prezo do billete sinxelo será de 13,5 euros para o tramo Santiago-Ourense; 10,5 euros entre A Coruña e Santiago e 22,5 euros entre A Coruña e Ourense.

ABONO DE 10 VIAXES

Ademais, o departamento informa, como "novidade", do 'Abono 10', que se suma ao 'Abono Tarxeta Plus' de 20 a 50 viaxes xa existente neste produto de alta velocidade.

Este novo abono de 10 viaxes, explica, permite un aforro do 15%, cun prezo por traxecto de 8,93 euros entre A Coruña e Santiago; 11,48 euros entre Santiago e Ourense e 19,13 euros se se realiza completo.

"Pensando nos viaxeiros que usan de forma frecuente os servizos de Renfe", apunta Fomento, establécense "distintos tipos de descontos en función do número de viaxes". Así, un 'Abono Tarxeta Plus' de 20 viaxes permite un aforro de ata o 31%; mentres que o de 40 viaxes se incrementa ata o 53% e o de 50, ata o 57%.

COMPROMISO DE PUNTUALIDADE

En total, dende o próximo 10 de decembro circularán cinco servizos Avant por sentido, en días laborables, entre Santiago e Ourense, dous dos cales conectarán con A Coruña.

Estes novos trens súmanse aos servizos do Eixe Atlántico que prestan servizo dende A Coruña ata Vigo e ao Talgo diúrno que conecta con Madrid, indica o ministerio.

Ademais, apunta que a oferta de Media Distancia pola antiga liña convencional entre Ourense e Santiago continúa atendendo as poboacións de Lalín e O Carballiño con seis trens diarios --tres por sentido-- e conecta con outros trens da rede de Media Distancia de Galicia e co servizo Talgo.

O servizo Avant, "ademais de calidade e rapidez", garante aos seus clientes chegar a tempo ao seu destino grazas ao compromiso de puntualidade de Renfe, subliña Fomento. Deste modo, se o atraso é superior a 15 minutos, Renfe devolverá o 50% do billete; mentres que o reintegro será do 100% se é superior a 30 minutos.

TRENS DE ÚLTIMA XERACIÓN

Prestarase con trens de última xeración, os da serie 121, fabricados por CAF-Alstom, que son de ancho variable e foron especialmente deseñados para cubrir os servizos de Media Distancia por vías UIC e convencionais.

Este tren, que alcanza unha velocidade máxima de 250 quilómetros por hora, ten un total de 280 prazas, en clase única turista, máis dous adicionais para persoas con mobilidade reducida e proporciona un maior confort e calidade ao viaxeiro. O S-121 conta, ademais, con enchufes en todos os asentos así como cunha zona de máquinas de venda de bebidas e snacks.

Ademais, as tres estacións nas que prestará servizo o novo Avant contarán con persoal de servizo en terra para recibir os clientes nos controis de acceso, e un servizo Atendo para viaxeiros que necesiten unha atención especial ao viaxar, así como máquinas de auto venda de billetes.

UN 7,5 SOBRE 10

Na estación de Santiago, Renfe dispuxo dun novo Punto de Información e Atención ao Cliente coincidindo coa posta en servizo do produto Avant.

O servizo Avant de Renfe está avalado polos viaxeiros, que lle outorgan unha nota en calidade de 7,5 sobre 10. A satisfacción dos clientes con este servizo é do 93,5%, cunha puntualidade que rolda o 96%. Ademais, o 94% dos viaxeiros recomendan o uso do Avant.