SANTIAGO DE COMPOSTELA, 1 Mar. (EUROPA PRESS) -
O voceiro de Alternativa Galega de Esquerda (AGE), Xosé Manuel Beiras, compara a "estabilidade" que defende o presidente da Xunta, Alberto Núñez Feijóo, coa "estabilidade absoluta" do "franquismo".
"Eu vivín 40 anos da miña vida baixo o franquismo: a estabilidade era absoluta", resolveu o histórico dirixente nacionalista, tras ser preguntado pola "estabilidade" que defendeu Feijóo, na convención do PPdeG desta fin de semana, en contraposición a partidos como o PSOE, Esquerda Unida e Podemos.
De feito, Beiras cre que a devandita "estabilidade" parece ser "cada día máis absoluta". "Polo tanto, estamos vivindo o franquismo", resolveu o número un de AGE.
Tamén cargou contra o presidente da Xunta por "presumir" de enviar "os mellores" aos concellos, en referencia ao exconselleiro de Educación e candidato do PP á Alcaldía de Ourense, Jesús Vázquez; e á exconselleira de Facenda e candidata do PP á Alcaldía de Vigo, Elena Muñoz.
"Polo tanto, queda cos peores na Xunta de Galicia. Se eran moi malos, ¿que é o que nos queda agora?", resolveu o histórico líder nacionalista na manifestación convocada pola Plataforma Galega de Afectados pola Hepatite C.
