SANTIAGO DE COMPOSTELA, 29 Jun. (EUROPA PRESS) -
O voceiro parlamentario de AGE, Xosé Manuel Beiras, mostrou o seu "desprezo total" cara ao que diga o presidente da Xunta, Alberto Núñez Feijóo, debido a que considera a súa "indignidade moral tan grande", e afeoulle que invocara a Castelao "para arremeter contra a cidadanía que se organiza democraticamente".
"Invoca nada menos que ao autor de 'Atila en Galicia", indicou preguntado polas palabras de Feijóo no acto de entrega das Medallas Castelao no que apelou á "humildade" do intelectual para pedir o respecto ás tradicións ancestrais en alusión ás mareas e a súa ausencia de actos relixiosos.
"Non, non me merece ningún comentario o que diga ese desalmado, que invoca a Castelao para arremeter contra a cidadanía que se organiza democraticamente", dixo Beiras.
Así, afirmou que "simplemente é un sicario dos que reduciron a precaria economía galega a cinzas" para argumentar que non lle "merecía ningún comentario". "O meu desprezo é total, a súa indignidade moral é tan grande que non me merece, dáme igual o que diga Núñez Feijóo", abundou.
Dito isto, agregou que "bastante ten que apandar co que lle está a dicir a cidadanía cos votos; e non a cantazos, de votos, claro, metafóricos".
Posteriormente, ao respecto dunha pregunta sobre as perspectivas electorais, Beiras interrompeu a cuestión para reivindicar a importancia do asunto da rolda de prensa, vinculado coa situación de Grecia, e advertir da relevancia da cuestión fronte a outros "intereses" e "cositas" das que se poidan falar nos medios. "Estamos no momento máis crucial dos últimos 50 anos", indicou.
