SANTIAGO DE COMPOSTELA, 25 Nov. (EUROPA PRESS) -
O líder do PSdeG, José Ramón Gómez Besteiro, respondeu ao alcalde de Becerreá, Manuel Martínez, quen o martes proclamou que ser socialista é "un sentimento" que "non" lle poderán quitar, que "votar reincidentemente co PP" na Deputación de Lugo "non é a mellor forma de solucionar os problemas nin de chamarse socialista".
Preguntado polos xornalistas nun acto en Santiago sobre a situación do goberno provincial de Lugo, en minoría tras a expulsión de Martínez ao grupo de non adscritos, restou importancia á cuestión numérica. "Acontece en moitas corporacións", apostilou.
Neste escenario, ao que apelou é á "responsabilidade de quen está na oposición e debe contribuír a construír un proxecto de provincia" e "apostar por que non se deteñan as políticas progresistas" que el desenvolveu durante os os seus oito anos como presidente de Deputación de Lugo.
E tras indicar que "non" falou co rexedor de Becerreá, Besteiro cargou contra "a forma de facer política" do PP. "Son capaces de votar o contrario do que votaron hai tres meses", censurou, crítico coa súa "irresponsabilidade" durante o seu paso polo goberno e tamén "agora na oposición".
Ao fío diso, abundou en que a etapa de presidencia de Elena Candia supuxo "hipotecar unha deputación que recibiu con débeda cero" a base de "convenios ata 2019 con concellos do PP" e "pasar de ser a deputación que máis rápido pagaba aos seus provedores a ser a última". "O que vi eses tres meses non o quero para a miña provincia", sentenciou o xefe de filas do PSdeG.
