Acusa ao PP de pretender tomar "pola forza" o goberno dos municipios e "eliminar" a pluralidade
SANTIAGO DE COMPOSTELA, 26 Ago. (EUROPA PRESS) -
O BNG acusou o PP de intentar impulsar unha reforma electoral que "fomentará" e "amparará a corrupción", concentrando o poder "en mans duns poucos", ademais de converter os concellos galegos en "apéndices" das decisións que se tomen "en Génova".
En rolda de prensa, a deputada do BNG Tereixa Paz denunciou a intención do PP de facerse "pola forza" co goberno dos municipios, mediante unha proposta de reforma que favorecerá a investidura automática de alcalde a quen ocupe o primeiro posto da lista máis votada, aínda que non se corresponda coa vontade da maioría dos cidadáns que emitiron o seu voto.
Paz atribuíu este movemento a que ao PP "lle dá medo" perder a maioría absoluta polo "maior afastamento" da cidadanía tras as medidas de recorte tomadas nos últimos anos, polo que intentarán consolidar unha concepción "personalista" dos concellos que "elimina" o pluralismo.
Así, recordou que "tódalas persoas" que participaron na comisión de corrupción no Parlamento galego coincidiron en que, na loita contra esta situación, é necesario que as decisións sexan "o máis colexiadas posibles", tomadas polo maior número de persoas que se poida e con "transparencia" e instrumentos para "controlar" a acción de Goberno.
"Esta reforma ve no sentido radicalmente contrario", criticou, polo que considerou que solo servirá para fomentar a "corrupción" e ocupar as institucións para "favorecer e resolver" problemas e intereses "individuais".
Tamén presente no acto, a responsable de acción municipal do BNG, Goretti Sanmartín, advertiu de que a devandita reforma suporá unha "negación" da participación cidadá, intentando que as eleccións "sexa unha cousa que pasa cada catro anos" e que permitirá a "unha persoa" facer o que crea conveniente "sen pasar" por ningún filtro, ademais de "solucionar os problemas persoais" dos cargos do PP "que se queiran manter".
Isto provocará que aconteza "o mesmo" que pasou este luns en Compostela, en alusión ás cargas policiais a unha manifestación en contra dos recortes da UE, e "tratar de negar a Galicia real", na que os galegos "queren participar na política de xeito real".
Por iso, considerou que a reforma debería "darlle esas canles" de participación á cidadanía, algo que "non está na axenda do PP", lamentou.
Así, avanzou que o BNG iniciará en setembro unha campaña "moi intensa" a través de propostas nos distintos parlamentos e transmitíndolle a cidadanía que buscan "outra forma de facer política" e que o contrario leva a "un Estado de excepción".
INICIATIVAS
O Grupo Parlamentario do BNG presentou unha Proposición non de Lei para o seu debate no Pleno na que pedirá a Cámara a que inste á Xunta a manifestar a súa "rotunda oposición" á reforma da lexislación electoral formulada polo Goberno do Estado e que se dirixa a este organismo para buscar unha modificación que favoreza "unha mellor expresión nos órganos de representación da pluralidade política".
Neste último punto, propoñen medidas como a definición, salvo no caso de eleccións municipais, como circunscrición electoral a Comunidade Autónoma; eliminación da regra d'Hont por outra que garanta un resultado máis proporcional á vontade cidadá"; ou a regulación da capacidade da convocatoria de referendo, entre outros puntos.
