Carme Adán condena o asasinato de Barro e o disparo de Chantada e pide pasar das "palabras" aos feitos
SANTIAGO DE COMPOSTELA, 27 Ago. (EUROPA PRESS) -
A voceiro de Igualdade do Grupo Parlamentario do BNG, Carme Adán, esixiu este mércores a "convocatoria" da Comisión de Igualdade ante os novos casos de violencia machista e reclamou, así mesmo, un "plan de medidas urxentes" neste ámbito, que pasaría, en primeiro termo, por "desenvolver as leis que xa existen".
En rolda de prensa convocada para abordar a situación da Lei de Dependencia, e de xeito preliminar despois de que unha muller fose asasinada en Barro e outra fose disparada en Chantada (Lugo) nos últimos días, Carme Adán condenou estes dous casos, ao tempo que advertiu de que "hai que pasar das palabras aos feitos".
"Hai que ir máis alá das palabras", abundou a parlamentaria nacionalista, quen asegurou que "non chega só con iso", polo que urxen "medidas" para facer fronte a estas situacións.
Na súa comparecencia, Carme Adán lamentou que, por un lado, "se condene" a violencia machista e que, por outro, se sigan reproducindo "declaracións machistas", porque, advertiu, este tipo de frases "non son unha broma" e "calan na sociedade".
Neste punto, referiuse ao exministro Miguel Arias Cañete, ao respecto do que lamentou que "un machista se estea a pelexar por ser comisario". "Ningunha declaración machista ou racista debe pasar desapercibida", sentenciou, tras asegurar "que nin son bromas nin se poden permitir".
POLÍTICAS DE IGUALDADE
Carme Adán rexeitou establecer unha relación entre os casos de violencia de xénero e a cor política do Goberno correspondente, pero si considerou que "o que é certo é que cando non se cre na igualdade, non se fai traballo" sobre ela.
Ao respecto das políticas, a parlamentaria nacionalista advertiu de que "calquera recorte" no estado de benestar, como en asuntos relacionados coa Dependencia, acaba repercutindo nas mulleres.
Ademais, sinalou que actuacións como subvencionar a segregación de sexos nos colexios transmiten a idea de que os nenos e as nenas "son diferentes", polo que se "envía unha mensaxe de desigualdade" xa na infancia.
En canto ao papel dos medios de comunicación, e tras recordar que xa se abordou na Comisión de Igualdade por parte do Colexio de Xornalistas cun traballo "moi importante", apostou por evitar o "sensacionalismo" e que se emitan as informacións da forma "máis aséptica posible", focalizando o caso no agresor.
Carme Adán tamén chamou a atención sobre que os recortes en igualdade supoñen, así mesmo, diminución dos programas "educativos" neste valor, e concluíu que a igualdade entre homes e mulleres pasa polo ensino nestes termos.
Neste contexto, tamén fixo un chamamento aos homes, para que "dean un paso á fronte", e se "comprometan" coa igualdade no "propio grupo de homes".
