O BNG pide convocar a Deputación Permanente para que Feijóo explique "regueiro de incumprimentos" co naval

A formación organiza un acto público de defensa do sector para o 21 de setembro na bisbarra de Ferrol

SANTIAGO DE COMPOSTELA/FERROL, 10 Sep. (EUROPA PRESS) -

A voceiro parlamentaria do BNG, Ana Pontón, pediu este luns unha convocatoria da Deputación Permanente do Parlamento galego para que o presidente da Xunta, Alberto Núñez Feijóo, dea explicacións sobre o "regueiro de incumprimentos" co sector naval, que se atopa nun punto "crítico" e que perdeu 10.000 empregos nos últimos anos.

En concreto, a nacionalista referiuse a tres aspectos concretos sobre os que pide aclaracións ao xefe do Executivo galego, os contratos anunciados con Pemex, o novo sistema que substitúa ao 'tax lease' e o dique flotante para Ferrol.

A situación, insistiu, é de "verdadeira emerxencia" e está "en xogo" o futuro do naval galego, que representa o 5,7% do PIB, e o de "miles de postos de traballo". "Os problemas do naval non poden atribuirse en exclusiva á crise, hai decisións políticas que están a imposibilitar o seu desenvolvemento", criticou e advertiu o PP de que "non pode escorrer as súas responsabilidades".

Ao seu xuízo, a Xunta actuou con "complicidade" nalgunha destas decisións que prexudican ao naval galego e fixo "incumprimento de funcións". O novo 'tax lease' "segue pendente" e o "responsable directo" é o Goberno central, afirmou Pontón, que considerou que "non deu un só paso" para ter un novo sistema de bonificación fiscal e iso impide aos estaleiros galegos obter contratos para facer barcos.

Ademais, criticou que o BNG non recibiu a información solicitada sobre a proposta remitida a Bruxelas ou sobre os contratos con Pemex e, sobre este último asunto, criticou que os anuncios "non se concretaron". "De momento, o que temos é anuncios e incertezas. O único certo é que non hai estaleiros que estean a construír os buques anunciados", dixo e recordou a denuncia dos sindicatos advertindo de que eses barcos serán adxudicados en Corea.

Sobre Ferrol, Pontón criticou que Feijóo dixo que en xuño estaría despexado "o camiño de Navantia", pero dende ese mes se perderon 700 empregos no sector en Ferrol e "Feijóo non dá a cara". Nas bancadas de Navantia non hai ningún buque en construción "por primeira vez en décadas", lamentou.

Así, a nacionalista considerou que a situación é "suficientemente grave" para que se convoque unha reunión da Deputación Permanente e Feijóo "dea a cara" e "diga por unha vez a verdade".

DIQUE FLOTANTE EN FERROL

Tamén o deputado Fernando Branco (BNG) deu unha rolda de prensa, en Ferrol, sobre o sector naval, na que reclamou tamén a presenza na cidade do conselleiro de Economía e Industria, Javier Guerra, ao que acusou de estar "desaparecido" este último ano, en contraste coas súas visitas "hai un ano cando chegaba con estudios que prometían investimentos" para a construción do dique flotante. "Pasaron as eleccións xerais e do conselleiro e dos seus estudios non sabemos nada", engadiu.

Branco Parga tamén ironizou coa petición desta fin de semana, que acusou de "sorprendente" e de "burla", do alcalde de Ferrol, José Manuel Rey Varela, de axuda á Virxe dos Remedios para as xestións que as distintas administracións realizan para conseguir manter a actividade dos estaleiros.

"Non temos constancia de que a Virxe dos Remedios se presente ás eleccións, pero si o Partido Popular, e preferimos que o alcalde faga estas peticións aos presidentes do Goberno e da Xunta de Galicia".

Para Fernando Branco Parga, Feijóo non cumpriu ningunha das promesas realizadas nos últimos anos. Sinalou que antes das eleccións autonómicas se comprometeu á creación dun centro de reparacións que xeraría 2.000 postos de emprego na antiga Astano. Posteriormente, antes dos comicios municipais, anunciou un plan para Navantia en 2011 do que "nunca máis se soubo", e "en marzo deste ano dixo que antes do verán habería ou dique ou carga de traballo".

ACTO PÚBLICO O 21 DE SETEMBRO

O Bloque Nacionalista Galego realizará un acto público de defensa do sector naval da bisbarra de Ferrolterra que terá lugar o 21 de setembro ás 20.00 horas na praza do Himno Galego en Ferrol coa participación do candidato nacionalista á presidencia da Xunta, Francisco Jorquera.

A coordinadora comarcal do BNG, Mercedes Tobío, anunciou que a formación política desenvolverá ademais unha campaña de información do sector naval nos municipios da ría de Ferrol porque para evitar que "se decapite" un sector naval que cualificou de "vital e primordial" para a bisbarra.