O BNG pide un plan de viabilidade para Pescanova e recuperar as primas eólicas nunha "primavera negra" na industria

SANTIAGO DE COMPOSTELA 23 May. (EUROPA PRESS) -

A voceiro de industria do BNG, Carme Adán, reclamou este xoves á Xunta que explique no Parlamento galego o plan de futuro que teña para Pescanova e que reclame o Goberno central a reposición das primas ás enerxías renovables, co fin de superar a "parálise" que sofre o sector eólico.

Nunha rolda de prensa para presentar iniciativas parlamentarias neste sentido, Adán reclamou o Goberno galego que sexa "actor" e non "espectador" ante os problemas que ten Galicia, sumida "nunha primavera negra" para a industria.

A deputada da formación nacionalista advertiu de que a industria galega está "en caída libre sen rede". As antigas caixas, dixo, servían como "rede", pero agora, sen estas entidades e cunha Consellería de Economía e Industria "totalmente inoperativa", a industria perde emprego.

Ademais, avisou, está "pendente dun fío, o futuro dunha empresa sistémica", que é Pescanova e puxo como exemplo a situación da bisbarra de Vigo, onde nos últimos catro anos, segundo datos dos sindicatos, se destruíu o 60% do tecido industrial. Por iso, o BNG reclamou que o conselleiro Francisco Conde compareza no Parlamento para explicar a situación deste sector e, en concreto, qué plans de futuro ten para a multinacional pesqueira.

Adán pediu tamén que aclare as "informacións contraditorias" sobre o aval solicitado para Pescanova. A situación, defendeu, é "suficientemente grave" como para que o Parlamento sexa informado e poida achegar as súas propostas.

A nacionalista criticou tamén o papel do Instituto Galego de Promoción Económica (Igape), que considerou que está a ser "totalmente inútil" e apostou por transformalo nun "instituto oficial de crédito galego que teña capacidade de acudir aos mercados financeiros".

Sobre o eólico, a voceiro de industria do BNG advertiu da "parálise total" deste sector e reclamou que se recuperen as primas ás enerxías renovables. Neste sentido explicou que, segundo a prensa de Canarias, as illas contarán cun sistema de primas antes do verán, xustificado pola súa "singularidade".

O BNG reclama que tamén se teña presente que Galicia é "un dos maiores produtores de renovables" e pediu ao ministro de Industria e ao propio presidente do Goberno que "analicen a situación de Galicia" e eliminen a "penalización" ás renovables. "É un erro que estamos a pagar moi caro", sinalou.

AS INICIATIVAS

Co fin de debater estes asuntos, o BNG rexistrou tres iniciativas parlamentarias. Dous delas son proposicións non de lei para debater no pleno. A primeira reclama a reposición das primas ás renovables e que se desenvolvan accións para que estas enerxías "non abandonen" Galicia. A segunda pide a comparecencia de Conde no Parlamento para explicar os seus plans sobre Pescanova.

Por último, o BNG preguntará á Xunta na Comisión 6ª pola situación da empresa con sede en Chapela, polos plans da Xunta e polos motivos para non conceder o aval.