SANTIAGO DE COMPOSTELA, 1 Sep. (EUROPA PRESS) -
O voceiro parlamentario do BNG, Francisco Jorquera, xulgou este luns que a reforma electoral que propugna o presidente do Goberno, Mariano Rajoy, supón "un golpe de estado legal" e "unha perversión total da democracia".
En declaracións aos medios na Cámara galega, o dirixente nacionalista xustificou as súas aseveracións en que existe "unha lei non escrita" que impide "cambiar as regras do xogo unilateralmente e a beneficio exclusivo dunha parte" e, ademais, facelo "a cinco minutos de que remate o partido".
Así, reprochou a Rajoy que "reviste de rexeneración democrática" unha medida que "avanza no contrario", ao outorgar "un plus" de representación á lista máis votada establecendo "un sistema maioritario de feito".
Por iso, como dixo o deputado da formación frentista, esta reforma agrava a "distorsión" que xa provoca o sistema electoral vixente "entre o que votan os cidadáns e o seu reflexo na composición" das distintas institucións. Así as cousas, "vai contar coa oposición frontal" do Bloque.
E é que, ao seu xuízo, a sociedade "demanda o contrario", un sistema "máis democrático". "Pero o PP, en vez de avanzar nesta dirección, está a socavar os principios básicos da democracia", sentenciou.
REFORMAS DO BNG
Dito isto, Jorquera reivindicou as súas propostas de reforma enfocadas a que "as institucións reflictan a vontade dos cidadáns expresada nas urnas".
Por exemplo, en Galicia propuxo o BNG que "todos os votos vallan igual" e, así, o Parlamento "sexa fiel reflexo" do votado; e unha lei de consultas populares para que "todas as decisións vitais teñan que ser consultadas á cidadanía".
