Caballero acusa a Feijóo de "mentir" co informe da fusión para "favorecer ao norte de Galicia en contra de Vigo"

EUROPA PRESS

VIGO 19 Jun. (EUROPA PRESS) -

O alcalde de Vigo, Abel Caballero, acusou ao presidente da Xunta de Galicia, Alberto Núñez Feijóo, de "mentir" sobre o informe da auditora KPMG sobre a fusión das caixas galegas co obxectivo de "favorecer ao norte de Galicia en contra de Vigo". Así, preguntoulle "como vai asumir responsabilidades por quebrar o sistema das caixas de aforro galegas".

Nunha rolda de prensa en Vigo, Caballero acusou ao xefe do Executivo galego de recorrer a unha "mentira detestable e indigna" porque, segundo afirmou, "sabía" que "a fusión non estaba avalada" polo documento que "encargou e pagou" a KPMG. "Advertímosllo e Vigo saíu á rúa", apuntou o rexedor, aludindo á manifestación que, no seu día, el mesmo convocou en contra da fusión.

Así, acusou a Feijóo de "mentir" para "favorecer ao norte de Galicia en contra de Vigo", pois, segundo afirmou, "Caixa Galicia necesitaba infinitamente máis axudas" que Caixanova e "ao fusionalas as afundiron ás dúas". Nese sentido, mantivo que a caixa viguesa "tiña futuro" sen a unión.

En canto á reclamación de responsabilidades, considerou que o presidente da Xunta "sabe moi ben como as ten que asumir" e, nese sentido, preguntouse que pasaría en Alemaña, Francia ou en calquera país "despois de coñecerse unha mentira desta envergadura".

"Era unha felonía do señor Feijóo que mentiu e preferiu afundir as caixas a que Caixanova continuase o seu futuro, porque o tiña", insistiu o socialista, quen esperou que o mandatario galego "estea a dar unha rolda de prensa e dando explicacións da súa gran mentira".

Pola súa banda, a voceira do grupo municipal do BNG, Iolanda Veloso, estimou que "dende o primeiro momento", tanto PP como PSOE, "querían a privatización e desaparición das caixas". Nesa liña, mantivo que, a partir de aí, as auditorías e informes encargados teñen "unha intencionalidade clara" segundo a "ruta marcada dende o primeiro momento".