Caballero cre que o acordo de Pymar é "o principio da recuperación do sector naval de Vigo"

EUROPA PRESS

VIGO 10 Feb. (EUROPA PRESS) -

O alcalde de Vigo, Abel Caballero, cualificou como "unha gran noticia" o anuncio de que Pymar (Pequenos e Medianos Estaleiros Sociedade de Reconversión) sumarase ao convenio de acredores do estaleiro Vulcano, o que significa que a empresa non terá que ir á liquidación e poderá manter a súa actividade.

Caballero recordou que, hai poucos días, se reuniu o Consello Social da cidade e fixo un chamamento expreso para que Pymar se sumase a ese convenio --como xa fixo anteriormente a Xunta de Galicia, e o comité de empresa do propio estaleiro--.

"Estamos ante un primeiro paso moi importante, queremos que Vulcano teña actividade e carga de traballo. Este é o principio da recuperación do sector naval de Vigo. É unha magnífica noticia para a cidade", concluíu o rexedor olívico.

"CAMIÑO A SEGUIR"

Pola súa banda, o voceiro do BNG, Santiago Domínguez, tamén mostrou a súa satisfacción polo acordo do consello de Pymar, e apuntou que "este é o camiño a seguir". Non obstante, recordou que "hai que seguir reclamando á UE, á Xunta e ao Goberno central que o sector naval non sexa unha moeda de cambio".

O Grupo Municipal do PP felicitou á Xunta polas súas xestións para conseguir o acordo de Pymar, así como para habilitar un sistema de bonificación fiscal alternativo ao 'tax lease', que permita continuar a contratación de barcos. Así mesmo, criticaron o "silencio" e a "inacción" do PSOE e do alcalde, Abel Caballero, ante os problemas do sector.