Caballero insta a Feijóo e Rajoy a crear unha "fronte común" para "mobilizarse" en Bruxelas en defensa do naval

VIGO 18 Jun. (EUROPA PRESS) -

O alcalde de Vigo, Abel Caballero, instou este martes o presidente da Xunta e o presidente do goberno a crear unha "fronte común" para "mobilizarse" en Bruxelas en defensa do sector naval.

Asi manifestouno o rexedor en rolda de prensa tras manter un encontro con representantes sindicais do sector (de CC.OO., UGT e CIG). Caballero insistiu na súa "inmensa preocupación" porque o comisario europeo Joaquín Almunia "continúa coa idea de dar un golpe de man" o naval.

O alcalde acusou a Rajoy e a Feijóo de ser "cómplices" dunha posible decisión negativa da comisión de competencia da UE (sobre unha probable retroactividade na suspensión do tax lease) debido ao seu "silencio", polo que os instou a actuar para "paralizar a decisión de Bruxelas".

Así, instou o presidente da Xunta a que convoque "inmediatamente" aos representantes institucionais e sindicais para "facer unha mobilización conxunta" e viaxar este próximo venres a Bruxelas para manter un encontro con Almunia.

Abel Caballero insistiu en que a decisión sobre o expediente do tax lease "é cuestión de días" e volveu formular a súa sospeita de que esta decisión sexa negativa para o sector, é dicir, que teña que devolver parte das bonificacións aplicadas. "Que non nos obriguen a deixar de producir por un maldito axuste co pasado, que ademais, foi un erro que cometeron outros," sinalou o alcalde.

Pola súa banda, os sindicatos insistiron en reclamar unha maior implicación das administracións central e autonómica na defensa do naval. Mentres, continúan os preparativos para a xornada de folga no sector convocada para o próximo xoves.

Ese día, os traballadores dos estaleiros privados concentraranse a primeira hora da mañá nas zonas de Teis e Beiramar e marcharán en manifestación cara ao centro de Vigo onde, tras percorrer varias rúas céntricas, concluirán cunha asemblea fronte á delegación da Xunta de Galicia.