CIG Saúde asegura que a saturación é "total e absoluta" e acusa de "falta de previsión e organización" a xerencia
SANTIAGO DE COMPOSTEla, 12 Feb. (EUROPA PRESS) -
O Complexo Hospitalario Universitario de Santiago (Chus) recorreu a unha planta do Gil Casares, "normalmente pechada porque non é necesaria", segundo explicaron fontes do Clínico a Europa Press, para facer fronte ao repunte rexistrado no servizo de urxencias dende comezos desta semana.
As mesmas fontes negan que se estea a producir un "colapso", ante a denuncia realizada este venres pola central CIG Saúde, que asegura que a saturación é "total e absoluta" e acusa de "falta de previsión e organización" á xerencia e dirección de enfermaría desta área.
En concreto, refírese á situación vivida na tarde noite deste xoves, con "355 pacientes vistos ata as 00,00 horas" e 23 "pendentes de ingreso nas unidades". Fala este sindicato de 49 pacientes nunha sala de observación que estivo "chea", como a de monitorización, con outras oito persoas, e unha vintena, de acordo cos seus números, en 'boxes'.
Apunta, igualmente, á presenza de 13 enfermos en sala de sillón "e catro máis na sala de curas para unha soa enfermeira". "Falta total de previsión por parte desta xerencia", resume, antes de advertir de que o Hospital do Barbanza se atopa na "mesma situación".
VERSIÓN DO CLÍNICO
Pola súa banda, as fontes do Clínico consultadas por Europa Press negaron o devandito "colapso", pero si recoñeceron que nos tres últimos días --dende o luns, pero fundamentalmente a partir do martes-- "hai un incremento de demanda de atención de urxencias".
Segundo sinalan estas fontes, o servizo está a rexistrar datos esta semana "por enriba da media" do ano pasado, cando era duns 300 usuarios, e agora supera esa cifra de pacientes. "Efectivamente, hai traballo", apuntan.
Non obstante, ante este panorama, defenden "reforzar" os recursos humanos tanto en urxencias coma nas plantas de hospitalización, un reforzo "de persoal sanitario, médico e de enfermaría".
Así mesmo, resaltan que están operativos "tódolos dispositivos", e no caso da hospitalización, refiren ao "recurso a maiores" que supón a mencionada planta do Gil Casares, "normalmente pechada porque non é necesaria", pero que se abre "cando hai picos de gripe, para persoas con infeccións respiratorias".
Aí, segundo afirma o Clínico, neste momento "hai espazo", posto que a planta do Gil Casares está, segundo as súas estimacións, a un 50% da súa ocupación.
Neste sentido, insisten en que si hai "máis demanda de actividade", pero rexeitan que exista "problema asistencial", ao dispoñerse "solucións".
Acerca do reforzo con "máis xente", apuntan que "as contratacións van variando", e que o persoal "se contrata por quendas, en función da demanda,", polo que a cifra está "constantemente en cambio".
Por último, en relación coa presenza de pacientes nos corredores, explican que, "como hai máis actividade", tamén se dan "momentos en que vai máis lento" o tránsito, e ao haber demanda de máis xente, ven inevitable que isto se produza, porque "ese trámite é necesario", e as urxencias se atenden en función da prioridade.
Pero negan que se estea "horas nos corredores esperando" e solicitan da poboación "un pouco de comprensión" nestes momentos de repunte pola gripe, que se produce todos os anos.
