A CORUÑA, 18 Dic. (EUROPA PRESS) -
O comité de empresa da planta de Alcoa na Coruña acolleu con "esperanza" o anuncio dunha segunda poxa, os días 22 e 23 de decembro, para asignar bloques adicionais do servizo de interrumpibilidade que ofrecen os grandes consumidores de electricidade por reducir a súa actividade cando o requira o sistema eléctrico.
En declaracións a Europa Press, tras a convocatoria do Ministerio de Industria, Enerxía e Turismo, o presidente do comité de empresa, Nazario Arias, cualificou de "positiva" a noticia. "Era o que estabamos a esperar", dixo".
Da empresa, indicou que Alcoa "ten que ir á poxa e defender o seu". Por iso, trasladou a "esperanza" do comité de empresa de "saír adiante con esta".
"Que nos valla para aguantar un ano", apostilou tras reiterar que o obxectivo do comité é evitar os despedimentos dos 400 traballadores e o peche da planta e, logo, reclamar unha nova regulación eléctrica.
NEGOCIACIÓNS COA EMPRESA
A poxa comezará o mesmo día en que a empresa e os traballadores das plantas da Coruña e Avilés están citados a unha nova reunión, en Madrid, no marco da negociación do expediente polo despedimento colectivo anunciado pola compañía en ambas as dúas fábricas.
Na poxa da próxima semana, subhastaranse 50 bloques de 5 MW, co que se engadirán 250 MW de interrumpibilidade. O prezo de saída de cada megavatio é de 195.000 euros, de modo que a poxa toma como partida un valor de 48,7 millóns de euros.
O anuncio da segunda poxa produciuse no día en que os traballadores da planta coruñesa convocaron unha manifestación, que partirá ás 17,30 horas da planta e que concluirá ante a sede de Rede Eléctrica de España (REE), nun percorrido duns sete quilómetros.
