SANTIAGO DE COMPOSTELA, 23 Jun. (EUROPA PRESS) -
O Concello de Santiago pechou o exercicio orzamentario de 2016 cun superávit de 7,9 millóns de euros. Diso deu conta este venres a concelleira de Economía e Facenda, María Rozas, quen puxo o foco en que o nivel de endebedamento do consistorio sitúase "nun 39,32%", "a cifra máis baixa da historia" do municipio.
Así, a liquidación do pasado ano arroxa que a débeda do concello compostelán é de 36 millóns de euros. Segundo Rozas, a porcentaxe de endebedamento está "moi por baixo" do límite legal, situado no 75%.
Así mesmo, a concelleira destacou que o peche do exercicio de 2016 "confirma a aposta polo mantemento" de "viarios, edificios municipais, instalacións deportivas e centros educativos".
EXECUCIÓN
A continuación, incidiu en que a partida para mantemento creceu un 6% --2 millóns de euros--, con "un total executado no capítulo de gastos do 91%".
No capítulo de obras e investimentos, só o 22% foi executado, o que, en palabras de Rozas, "confirma o problema estrutural" que Compostela Aberta xa advertira o pasado ano.
