Poñen a disposición das familias un equipo de psicólogos e lamenta o "día dramático" para este municipio
SANTIAGO DE COMPOSTELA, 29 Ago. (EUROPA PRESS) -
O Concello de Val do Dubra (A Coruña) decretou tres días de loito oficial polo falecemento de dous mozos nun accidente de tráfico. No sinistro, unha terceira persoa, unha rapaza de 16, resultou ferida e foi hospitalizada no Clínico de Santiago, pero o seu estado non reviste gravidade e podería ser dada de alta este mesmo sábado.
O rexedor dubrés, Antonio Negreira, confirmou a Europa Press que os tres mozos procedían de tres parroquias distintas de Val do Dubra --Couceiro, Rial e Vilariño-- e trasladou as "condolencias" do Concello ás familias neste "día dramático".
Negreira tamén explicou que o Concello, xunto coa central de emerxencias, puxo a disposición das familias un equipo de psicólogos para tratar de que "sexan capaces de pasar este trago tan difícil" ao que se enfrontan, tanto as familias dos falecidos, como a da terceira rapaza accidentada.
SUSPENDIDOS ACTOS OFICIAIS
No accidente, que se produciu en torno á 1,20 horas da madrugada deste sábado, faleceron un rapaz de 19 anos e outro de 16. O vehículo saíuse da vía na estrada que vai de Portomouro a Bembibre e colisionar contra unha árbore, o que provocou un incendio que calcinou o coche.
O Concello de Val do Dubra, tras unha reunión de urxencia dos voceiros, suspendeu dende este sábado e ata o luns todos os actos oficiais en sinal de do.
