LUGO, 21 Nov. (EUROPA PRESS) -
O rexistro levado a cabo este venres por axentes da Unidade de Delincuencia Económica e Fiscal (UDEF) por orde da titular do Xulgado de Instrución Número 1 de Lugo, Pilar de Lara Cifuentes, concluíu tras unhas 11 horas de envorcados informáticos e recollida de documentación sobre o programa de visitas 'Km 0' e outras actividades.
Sobre as 20,30 horas deste venres saíron os axentes das dependencias da Deputación de Lugo, segundo precisaron a Europa Press fontes da institución provincial.
O rexistro finalizou tras solicitar información no departamento de Fondos Europeos da Deputación provincial despois de facelo nas áreas de Vicepresidencia e Deportes. Pasadas as 19,00 horas a xuíza e os axentes chamaron o xefe deste departamento para solicitar máis documentación.
Nos rexistros levados a cabo por axentes da Unidade de Delincuencia Económica e Fiscal (UDEF) recolleron facturas e outra documentación relacionada co programa ambiental de visitas 'Km 0' e tamén sobre acordos co club deportivo Breogán na área de Deportes.
Na mañá deste venres, axentes da Unidade de Delincuencia Económica e Fiscal acudiron coa xuíza Pilar de Lara á institución provincial a pedir documentación e realizar envorcado de ordenadores das áreas vinculadas co programa 'Km 0'.
En concreto, os axentes solicitaron na Deputación o acceso e o envorcado de ordenadores de varios departamentos, todos eles relacionados co citado programa de visitas, como Relacións Institucionais, Unidades Km 0, Protocolo e Atención ao Cidadán, Gabinete de Comunicación e Contratación.
Unha vez concluído o rexistro no Gabinete de Comunicación da institución provincial, os axentes presentaron un novo oficio para o envorcado de información de ordenadores en Vicepresidencia e Deportes, áreas que xestionan os socios nacionalistas do executivo da Deputación de Lugo.
Da área de Deportes, os axentes requiriron documentación de acordos co Breogán, equipo de baloncesto da cidade de Lugo do que o accionista maioritario é a Deputación. Precisamente o presidente do club deportivo do Breogán é o vicepresidente da institución provincial lucense, o nacionalista Antonio Veiga.
CONCELLO
Estes rexistros foron ordenados pola titular do Xulgado de Instrución Número 1 de Lugo, que tamén mandou este venres o envorcado do ordenador dun funcionario do Concello da capital luguesa e solicitar documentación no marco das mesmas dilixencias previas sobre o programa ambiental e de visitas 'Km 0' que levou a outro rexistro na Deputación provincial.
Fontes municipais puntualizaron que unha comitiva xudicial, acompañada de axentes, acudiu na mañá deste venres ao Concello de Lugo para solicitar información dos servizos de Arquivo, Informática e Contratación.
CAIXÓN forzado
No marco dos rexistros, segundo precisaron fontes da institución provincial a Europa Press, os axentes tiveron que forzar o caixón do xefe de prensa da Deputación de Lugo ao atopar esta de vacacións e non estar a chave dispoñible para que puidesen levar documentación que acudiran a buscar.
As mesmas fontes restaron importancia a este feito xa que non lles quedou máis remedio que forzar o fecho do caixón situado ao lado do teléfono ao non ter a chave no lugar.
A Deputación aclarou que os axentes acudiron a pedir documentación e realizar envorcado de ordenadores aos departamentos relacionados co programa 'Km 0', como son Relacións Institucionais, Atención ao Cidadán, Comunicación e Contratación.
REXISTRO EN XULLO
O pasado mes de xullo axentes da Policía Xudicial acudiran de novo á Deputación de Lugo para solicitar información complementaria sobre este programa de visitas 'Km 0'.
Aquela visita xudicial partía dunha orde da xuíza de apoio do Xulgado de Instrución Número 1 de Lugo, Hortensia Bouso, na que se facilitara aos axentes toda a información que solicitaron. Agora, polas novas normas de repartición, De Lara fíxose cargo destas dilixencias.
En abril de 2013 o PP fixérase eco de que varias persoas ligadas con este programa de visitas, en parte financiado con fondos da Unión Europea (UE), foran chamadas a declarar no marco dunha investigación aberta pola Fiscalía, "a raíz das denuncias de varios traballadores", que supostamente "incluirían acusacións de relevancia penal e presuntos delitos de acoso laboral".
O Xulgado de Instrución Número 1 da capital abriu dilixencias sobre esta cuestión, se ben a Deputación negou "tallantemente" cando transcendeu a investigación da Fiscalía a posibilidade de que houbese malversación de fondos na xestión do programa.
