Sostén que 1.300 pacientes por médico é a ratio media en Galicia e defende que elevala a 1.500 permite unha atención "sen ningún problema"
FERROL, 20 Ago. (EUROPA PRESS) -
A conselleira de Sanidade, Rocío Mosquera, asegurou que non existe "ningún problema asistencial en ningún punto de toda Galicia", e que se reforzou o servizo asistencial en centros de Atención Primaria nos que "tradicionalmente hai unha maior demanda".
Así respondeu preguntada en Ferrol polas demandas que se rexistraron nalgúns puntos costeiros de Galicia de reforzos ante o incremento de poboación en época estival.
Rocío Mosquera negou problemas na atención sanitaria e insistiu en que "a asistencia está absolutamente garantida en tódalas partes" e que "non houbo atrasos nas consultas", agás nalgún "momento puntual", que atribuíu aos "catro días festivos" da última ponte, pero ao igual que "tódolos anos".
Mesmo neste período sinalou que "os servizos de urxencias estiveron a funcionar normalmente" e que a Consellería de Sanidade non detectou "ningún problema asistencial" "en ningún punto de Galicia".
PACIENTES POR MÉDICO
Ante o incremento da ratio de pacientes por médico de familia en determinadas áreas sanitarias de Galicia, que alcanza nalgúns casos os 1.500 pacientes, Rocío Mosquera matizou que a cifra é de media "1.300" e que aínda que hai profesionais que a superan, hai outros que "non chegan a mil".
En todo caso, aínda que a ratio de pacientes por médico péchase en 1.500, poderíase superar se o médico acepta algún outro paciente, tendo en conta que se trata dunha cifra, segundo Mosquera, que tanto asociacións de Atención Primaria como profesionais consideran "razoable" para atender pacientes "sen ningún problema".
Así, recordou que o "82% da poboación galega cualifica de "boa ou moi boa" a atención sanitaria en Galicia segundo o último barómetro e que xa se deron pasos para "desburocratizar" a Atención Primaria, reducindo en máis de 2 millóns as consultas administrativas nos últimos dous anos.
Ante a xubilación estimada de 800 profesionais do Sergas ata 2015, Mosquera puntualizou que "sempre se substituirá a todos os profesionais que se consideren necesarios para prestar a mellor asistencia".
AMBULANCIAS PARALIZADAS EN PONTEVEDRA
Por outra banda, Rocío Mosquera afirmou que as dúas ambulancias paralizadas en Pontevedra pola Policía Local da empresa BDM, pertencen a "unha empresa privada" que "non traballa co 061 nin co Sergas dende hai moitos anos" e que carecían tanto de autorización sanitaria coma de Tráfico, ao non pasar a ITV, entre outras irregularidades.
Por este motivo, sostén que é un tema que "non é competencia" da Consellería de Sanidade e que se trata "dun delito fiscal", que polo tanto ten que tratarse "por vía fiscal e non pola vía sanitaria".
