Consello.- Feijóo aposta por "baixar" o gasto de persoal nas deputacións e "repensar o seu papel"

SANTIAGO DE COMPOSTELA 9 Feb. (EUROPA PRESS) -

O máximo mandatario galego, Alberto Núñez Feijóo, mostrouse partidario este xoves de "baixar" o gasto de persoal nas deputacións porque "ninguén pode gastar o que non ten" e de "repensar o seu papel" para que "non se solapen" con municipios e Administración autonómica.

Ao termo do Consello da Xunta, avanzou que realizará este mes de febreiro unha proposta encamiñada a evitar "duplicidades" ao titular da Federación Galega de Muncipios e Provincias (Fegamp), José Manuel Rey, e aos presidentes das deputacións galegas.

Na mesma liña, sobre un posible acordo co PSOE para decidir o futuro destes entes, Feijóo replicou que, para iso, o primeiro sería que os socialistas "dixesen o mesmo" nas "latitudes" de Lugo, A Coruña, Ourense e Pontevedra.

"E cando escoito o presidente da Deputación de Lugo (o socialista José Ramón Gómez Besteiro) o seu discurso non coincide exactamente co responsable da organización socialista en Galicia", manifestou, en relación ao líder do PSdeG, Pachi Vázquez.

Así mesmo, indicou que as medidas de axuste que prepara a Xunta están "a disposición" dos municipios e deputacións, aínda que constatou que son os alcaldes os que deciden no ámbito das súas competencias se un determinado instrumento "pode ser ou non útil".