SANTIAGO DE COMPOSTELA, 19 Sep. (EUROPA PRESS) -
A reserva hidráulica dos encoros de Miño-Sil e Galicia Costa continúa coa súa caída e sitúase no 53% da súa capacidade, tras perder máis de dous puntos na última semana (era do 55,45% o 12 de setembro).
Así figura nos datos que publica este martes o Ministerio de Agricultura e Pesca, Alimentación e Medio Ambiente, onde se observa que a reserva hidráulica galega conta con 1.899 hectómetros cúbicos de auga, o que supón 118 menos que os 2.017 hectómetros cúbicos da semana pasada.
En encoros de Miño-Sil hai 1.516 hectómetros cúbicos de auga, 110 menos que os 1.626 da semana anterior. Ademais, está lonxe do ano anterior a estas alturas (1.971 hectómetros) e da media dos últimos 10 anos (1.832 hectómetros).
En Galicia Costa hai 383 hectómetros, oito menos que os 391 da semana pasada. Tamén son menos que os 441 do ano pasado e dos 410 da media da última década.
Ademais, o Ministerio informa de que esta semana as precipitacións foron abundantes na costa norte e no leste do país e que a máxima se rexistrou en Santander, con 93,3 litros por metro cadrado.
Pola súa banda, en España a reserva hidráulica atópase ao 40,3 por cento da súa capacidade total esta semana na que perdeu 499 hectómetros cúbicos, o que representa o 0,9 por cento, segundo datos do Ministerio de Agricultura e Pesca, Alimentación e Medio Ambiente, que sinala que na actualidade os encoros gardan 22.531 hectómetros cúbicos.
